జగన్ కు వైయస్ వివేకానంద రెడ్డీ దూరమే: సోనియాకు లేఖ

న్యూఢిల్లీ: ఓదార్పు యాత్ర విషయంలో అధిష్టానాన్ని బేఖాతరు చేస్తున్న తన సోదరుడి కుమారుడు, కడప పార్లమెంటు సభ్యుడు వైయస్ జగన్ కు కాంగ్రెసు ఎమ్మెల్సీ వైయస్ వివేకానంద రెడ్డి కూడా దూరం జరుగుతున్న సూచనలు కనిపిస్తున్నాయి. తాను పార్టీ వెంటనే ఉంటానని, తనకు పార్టీయే సుప్రీం అని తెలియజేస్తూ వైయస్ వివేకానంద రెడ్డి పార్టీ అధ్యక్షురాలు సోనియా గాంధీకి లేఖ రాసినట్లు ఓ తెలుగు ప్రైవేట్ టీవీ చానెల్ వార్తాకథనాన్ని ప్రసారం చేసింది. వైయస్ వివేకానంద రెడ్డి దూరం జరిగితే జగన్ చాలా ఇబ్బందులనే ఎదుర్కోవాల్సి వస్తుంది.

కాగా, కడప పార్లమెంటు సభ్యుడిగా ఉన్న కాలంలో వైయస్ వివేకానంద రెడ్డి చేత రాజీనామా చేయించి వైయస్ జగన్ పోటీ చేయాలని అనుకున్నారు. అయితే, సోనియా గాంధీ కలగజేసుకోవడంతో అప్పుడు అది ఆగిపోయింది. సాధారణ ఎన్నికల సమయంలో దివంగత నేత వైయస్ రాజశేఖర రెడ్డి తన సోదరుడు వైయస్ వివేకానంద రెడ్డికి కాకుండా తన కుమారుడు వైయస్ జగన్ కు లోకసభ సీటు ఇప్పించుకున్నారు. దాంతో వివేకానంద రెడ్డి పోటీ నుంచి తప్పుకోవాల్సి వచ్చింది. ఆ తర్వాత వివేకానంద రెడ్డి ఎమ్మెల్సీగా ఎన్నికయ్యారు.