సినిమా డ్రగ్ మాఫియాతో హీరోయిన్లకూ సంబంధాలు?

హైదరాబాద్: డ్రగ్ మాఫియాలతో కొంత మంది హీరోయిన్లకు కూడా సంబంధాలున్నట్లు అనుమానాలు వ్యక్తమవుతున్నాయి. మాదక ద్రవ్యాల విక్రయం వ్యవహారంలో హీరోయిన్ల పేర్లు కూడా వెలుగులోకి వచ్చాయని హైదరాబాద్ పోలీసు కమిషన్ ఎకె ఖాన్ చెప్పారు. హైదరాబాద్ మాదక ద్రవ్యాల విక్రయంపై నిఘా పెట్టామని ఆయన శుక్రవారం మీడియా ప్రతినిధుల సమావేశంలో చెప్పారు. మాదక ద్రవ్యాలతో పట్టుబడిన సినీ హీరో రవితేజ సోదరులు రఘుబాబు, భరత్ రాజు సహా నిందితులను పోలీసులు శుక్రవారం మీడియా ముందు ప్రవేశపెట్టారు. వారిపై మాదక ద్రవ్యాల చట్టం కింద నాన్ బెయిలబుల్ కేసు నమోదు చేసినట్లు ఖాన్ చెప్పారు.

మాదక ద్రవ్యాలకు సంబంధించి తమ వద్ద 60 మందికి పైగా ప్రముఖుల పేర్లు కూడా ఉన్నాయని ఆయన చెప్పారు. వారిని త్వరలోనే అదుపులోకి తీసుకుంటామని ఆయన అన్నారు. మాదక ద్రవ్యాల నిరోధానికి యాంటీ డ్రగ్ సెల్ ను ఏర్పాటు చేస్తామని ఆయన చెప్పారు. పిల్లలు మాదక ద్రవ్యాల బారిన పడకుండా చూడాల్సిన బాధ్యత తల్లిదండ్రులకు కూడా ఉందన్నారు. విదేశాల నుంచి వచ్చినవారిపై ప్రత్యేక దృష్టి పెట్టడంతో పాటు విదేశీ విద్యార్థులపై నిఘా పెంచుతున్నట్లు ఆయన తెలిపారు. మాదక ద్రవ్యాల వ్యవహారంలో ఎంతటి వారున్నా ఉపేక్షించేది లేదని ఆయన అన్నారు.