హీరో రవితేజను డ్రగ్స్ లింక్ పై పోలీసులు ప్రశ్నిస్తారా?

హైదరాబాద్: మాదక ద్రవ్యాల కేసు హీరో రవితేజ మెడకు కూడా చుట్టుకునే ప్రమాదం కనిపిస్తోంది. రవితేజ సోదరులు రఘుబాబు, భరత్ రాజు మాదక ద్రవ్యాలతో రవితేజ కారులోనే పట్టుబడ్డారు. వారు ప్రయాణిస్తున్న వాహనం రవితేజ పేరు మీద రిజిష్టర్ అయినట్లు పోలీసులు ధ్రువీకరించుకున్నారు. దీంతో పోలీసులు రవితేజను కూడా ప్రశ్నించేందుకు సన్నాహాలు చేసుకుంటున్నట్లు సమాచారం. రవితేజ సోదరులు ఇంతకు ముందు కూడా వివిధ కేసుల్లో ఇరుక్కున్నారు.

సినిమాల్లో చిన్న చిన్న వేషాలు వేస్తూ ఎంతో కష్టపడి హీరో స్థాయికి ఎదిగారు. ఆయన తెలుగు సినిమా ప్రపంచంలో హీరో స్థాయికి చేరుకోవడానికి ఎంతో కష్టపడ్డారు. ఆ సహనం, కష్టపడే గుణం ఆయన సోదరులకు ఉన్నట్లు లేదు. రఘుబాబు కొన్ని సినిమాల్లో నటించినప్పటికీ పెద్దగా విజయం సాధించలేకపోయాడు.