శ్రీకాంత్ భూమి వివాదం: తెలంగాణ జెఎసిపై కాకా గరం

హైదరాబాద్: భూ వివాదంలో సినీ నటుడు శ్రీకాంత్ కు మద్దతు ఇచ్చినందుకు కాంగ్రెసు సీనియర్ నాయకుడు జి. వెంకటస్వామి (కాకా) తెలంగాణ ఐక్య కార్యాచరణ కమిటీ (జెఎసి)పై మండిపడ్డారు. ఛీత్కరించారు. రంగారెడ్డి జిల్లాలోని శంకరపల్లి పోలీసు స్టేషన్ పరిధిలోని శ్రీకాంత్ మరదలి భూమిని వెంకటస్వామి అనుచరులు ఆక్రమించుకున్నట్లు ఫిర్యాదులు వచ్చిన విషయం తెలిసిందే. శ్రీకాంత్ కు తెలంగాణ జెఎసి మద్దతు ఇవ్వడమేమిటి, వీరేం తెలంగాణవాదులు అని కాకా శనివారం మీడియా ప్రతినిధుల సమావేశంలో ప్రశ్నించారు. తనను మించిన తెలంగాణవాది లేడని ఆయన ప్రకటించుకున్నారు.

ఆంధ్రకు చెందిన శ్రీకాంత్ కు మద్దతిస్తూ తెలంగాణ మాట మాట్లాడుతున్నారని, ఇటువంటి బతుకు కన్నా చావు మేలని ఆయన అన్నారు. ఇంతకన్న సిగ్గుచేటు మరోటి ఉండదని ఆయన అన్నారు. తన వద్ద భూమికి సంబంధించిన డాక్యుమెంట్లు ఉన్నాయని ఆయన అన్నారు. శ్రీకాంత్ వద్ద డాక్యుమెంట్లు ఉంటే చూపించాలని ఆయన డిమాండ్ చేశారు.