చిరంజీవితో నటిస్తానంటున్న పిఆర్పీ నేత శోభారాణి

హైదరాబాద్: తమ పార్టీ అధ్యక్షుడు చిరంజీవి నటిస్తున్న కొత్త చిత్రంలో తాను నటిస్తానని ప్రజారాజ్యం పార్టీ నాయకురాలు శోభారాణి అంటున్నారు. తనకు చిత్రంలో ఓ పాత్ర ఇవ్వాలని ఆమె ఇది వరకే చిరంజీవి కుమారుడు రామ్ చరణ్ తేజాను కోరినట్లు వార్తలు వచ్చాయి. తాను చిరంజీవి చిత్రంలో నటించడానికి ఉత్సాహం చూపుతున్నట్లు శోభారాణి ఓ ప్రైవేట్ టీవీ చానెల్ ప్రతినిధితో చెప్పారు. చిరంజీవికి సోదరిగా గానీ, తల్లిగా గానీ నటించేందుకు సిద్ధంగా ఉన్నట్లు ఆమె తెలిపారు. చిరంజీవి చేసే సినిమా సామాజిక ప్రయోజనాన్ని నెరవేర్చేదిగా ఉంటుందని ఆమె చెప్పారు.

చిరంజీవి తన 150 చిత్రం చేయడానికి సిద్ధపడినప్పటికీ ఆ సినిమా దర్శకుడు ఎవరనేది నిర్ణయం కాలేదని తెలుస్తోంది. రోబో దర్శకుడు శంకర్ అవకాశం ఇస్తే నటించడానికి సిద్ధంగా ఉన్నట్లు రోబో ఆడియో ఆవిష్కరణ సభలో ఆయన చెప్పారు. అయితే, శంకర్ అందుబాటులో ఉంటారా, లేదా అనేది తెలియడం లేదు. ఠాగూర్ చిత్రానికి దర్సకత్వం వహించిన వివి వినాయక్ గురించి కూడా ఆలోచన జరుగుతున్నట్లు తెలుస్తోంది. ఈ చిత్రాన్ని స్వయంగా రామ్ చరణ్ తేజా నిర్మిస్తున్నారు.