నేపాల్ లో విమానం కూలి 15 మంది మృతి

ఖాట్మండ్: నేపాల్ రాజధాని ఖాట్మండ్ సమీపంలో మంగళవారం విమానం కుప్పకూలిపోయింది. ఖాట్మండ్ నుండి టేకాఫ్ అయిన కాసేపటికే ఈ ప్రమాదం జరిగినట్లు అధికారులు తెలిపారు. ఈ ప్రమాదంలో విమానంలో ప్రయాణిస్తున్న ముగ్గురు సిబ్బందితో సహా 15 మంది మృతి చెందారు. ఎవరెస్టు ప్రాంతానికి వెళ్తుండగా వాతావరణం సరిగా లేక విమానం కూలిపోయినట్లు హోం మంత్రిత్వ శాఖ అధికారులు చెప్పారు.

చిన్నపాటి అగ్ని ఎయిర్ ప్లేన్ ఖాట్మండ్ నుంచి లుక్లాకు బయలుదేరింది. సంఘటనా స్థలానికి సహాయక బృందాలు బయలుదేరినట్లు, అది మారుమూల ప్రాంతం కావడంతో అక్కడికి చేరుకోవడం కష్టంగా ఉందని హోం మంత్రిత్వ శాఖ అధికార ప్రతినిధి జయముకుంద ఖనాల్ చెప్పారు. భారీ వర్షం కూడా సహాయక చర్యలకు ఆటంకం కలిగిస్తుందని భావిస్తున్నారు.