అనుమానాల నివృత్తి బాధ్యత ఈసిదే: ఇవియంలపై బాబు

న్యూఢిల్లీ: ఎలక్ట్రానిక్ వోటింగ్ యంత్రాలపై (ఈవీఎంలపై) అనుమానాలను నివృత్తి చేయాల్సిన బాధ్యత కేంద్ర ఎన్నికల సంఘానికి ఉందని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. ఈవీఎంలపై పార్టీల మద్దతు కూడగట్టేందుకు మంగళవారం ఢిల్లీ వచ్చిన చంద్రబాబు బుధవారం మీడియా ప్రతినిధులతో మాట్లాడారు. బీఎస్పీ, జేడీయూ, అన్నాడీఎంకే సహా అన్ని పార్టీలు ఈవీఎంలపై అభ్యంతరాలు వ్యక్తం చేశాయని అన్నారు. దీనిపై అఖిల పక్ష సమావేశం ఏర్పాటు చేసి సందేహాలను నివృత్తి చేయాలని ఆయన డిమాండ్‌ చేశారు.

ఈవీఎంలకు ప్రింటర్‌ ఏర్పాటు చేసి ఓటు వేసిన తర్వాత ఆ పేపరును ఓటరుకు అందించాలని ఆయన కోరారు. ఈవియంలపై అనుమానాలను వ్యక్తం చేసిన హరిప్రసాద్ అనే వ్యక్తిని అరెస్టు చేయడాన్ని ఆయన తప్పు పట్టారు. తిరుమల తిరుపతి దేవస్థానం (టిటిడి) వ్యవహారాలపై స్పెసిఫైడ్‌ అథారిటీని ఏర్పాటు చేయడాన్ని స్వాగతిస్తున్నట్లు ఆయన తెలిపారు. టిటిడి అక్రమాలపై విచారణ జరిపించాల్సిందేనని ఆయన అభిప్రాయపడ్డారు.