కోడలిపై కీచకుడిలా మామ లైంగిక వేధింపులు

హైదరాబాద్: తండ్రిలా చూసుకోవాల్సిన మామనే కోడలిపాలిటి కీచకుడయ్యాడు. కోడలిపై లైంగిక వేధింపులకు పాల్పడ్డాడు. బతిమాలిన కోడలిని దబాయించాడు. విశాల దృక్పథంతో ఆలోచించాలని హితబోధ చేశాడు. మామ మహేశ్వర్ గౌడ్ పై కోడలు విష్ణుప్రియ పోలీసులకు ఫిర్యాదు చేసింది. చెప్పినా పట్టించుకోలేదని భర్త విజయ్ ప్రతాప్ పై కూడా ఆమె ఫిర్యాదు చేసింది. దీంతో పోలీసులు మామ మహేశ్వర్ గౌడ్ ను, భర్త విజయ్ ప్రతాప్ ను పోలీసులు అరెస్టు చేశారు. ఈ సంఘటన రాష్ట్ర రాజధాని హైదరాబాదులోని విద్యానగర్ లో జరిగింది.

విష్ణుప్రియ, విజయ్ ప్రతాప్ లకు 2009లో వివాహమైంది. విష్ణుప్రియ తల్లిదండ్రులు కోటి రూపాయల కట్నం ఇచ్చినట్లు సమాచారం. పెళ్లయినప్పటి నుంచి తనను మామ లైంగికంగా వేధిస్తూనే ఉన్నాడని, ఎవరికైనా చెప్తే చంపేస్తానని బెదిరిస్తూ వస్తున్నాడని విష్ణుప్రియ మీడియా ప్రతినిధులతో చెప్పింది. తనను తల్లిదండ్రులు తీసుకుని వెళ్తానంటే కూడా అంగీకరించలేదని, అయితే చివరకు అనుమానం వచ్చి తనను తల్లిదండ్రులు తమ ఇంటికి రప్పించుకున్నారని ఆమె చెబుతోంది.