అక్టోబర్ లేదా నవంబర్ లో చిరంజీవి మెగా చిత్రం

బెంగళూర్: ప్రజారాజ్యం అధ్యక్షుడు చిరంజీవి మెగా చిత్ర నిర్మాణం ఈ ఏడాది అక్టోబర్ లేదా నవంబర్ లో మొదలవుతుంది. స్వయంగా చిరంజీవే ఆ విషయం చెప్పారు. నా నిరువుదు నిమగాగి అనే కన్నడ రియాల్టీ షో షూటింగ్ లో ఆయన శివరాజ్ కుమార్ తో కలిసి పాల్గొన్నారు. ఈ సందర్బంగా అభిమానులు చుట్టుముట్టినప్పుడు చిరంజీవి తన సినిమా సంగతి చెప్పారు. ఈ సందర్భంగా ఓ ప్రముఖ తెలుగు దినపత్రిక ప్రతినిధి ఆయనను పలుకరించారు. మాట్లాడడానికి ఏమీ లేదని, వైజాగ్ ప్లీనరీలోనే మాట్లాడి నోరు నొప్పిగా ఉందని, అంతా అక్కడే మాట్లాడేశానని ఆయన ఆ ప్రతినిధితో అన్నారు.

చిరంజీవితో పాటు శివరాజ్ కుమార్ ఆర్థిక సాయంతో రాధ(6) అనే చిన్నారి కళ్లకు శస్త్ర చికిత్స చేయించుకుంది. ఆ చిన్నారి కోరిక మేరకు చిరంజీవి ఆమెను కలిశారు. ఆమెకు కట్లు విప్పగానే మొదటగా చిరంజీవి కనిపించి ఆ బాలిక కోరిక తీర్చారు. తన మరణానంతరం తన కళ్లను దానం చేస్తానని సంతకం చేసిన పత్రాలను ఆయన శివరాజ్ కుమార్ తో కలిసి ఆస్పత్రికి అందజేశారు.