బ్యాంకాక్ లో లేడీ బ్యాగేజీలో బయట పడిన పులి పిల్ల

బ్యాంకాక్: బ్యాంకాక్ విమానాశ్రయంలో ఈ మహిళ బ్యాగేజీలో జీవించి ఉన్న పులి పిల్ల బయట పడింది. బ్యాంకాక్ నుంచి ఇరాన్ వెళ్తున్న మహిళ స్యూట్ కేసులో ఆ పులిపిల్ల బయటపడింది. ఆ మహిళ థాయ్ జాతీయురాలని పోలీసులు చెప్పారు. ఆ మహిళ బ్యాగ్ బరువు ఎక్కువగా అనిపించడంతో ఎక్స్ రేకు పంపారు. అందులో జీవించి ఉన్న జంతువు ఉన్నట్లు ఎక్స్ రేలో తేలిందని పోలీసులు చెప్పారు.

విమానం ఎక్కడానికి ముందు ఆ మహిళను సువర్ణభూమి విమానాశ్రయంలో అదుపులోకి తీసకున్నట్లు సంబంధిత అధికారి సూంచాయ్ పైఖాన్ చెప్పారు. పులి పిల్లను అభయారణ్యానికి తరలించినట్లు తెలిపారు. పులి పిల్లకు మూడు నెలల వయస్సు ఉన్నట్లు తేల్చారు.