రక్తచరిత్రపై రామ్ గోపాల్ వర్మకు లీగల్ నోటీసు

హైదరాబాద్: రామ్ గోపాల్ వర్మ చిత్రం రక్తచరిత్ర మరో వివాదంలో చిక్కుకుంది. రక్తచరిత్రపై రామ్ గోపాల్ వర్మకు లీగల్ నోటీసు జారీ అయింది. ఓబిరెడ్డి కుటుంబం ఆయనకు లీగల్ నోటీసు జారీ చేసింది. ఓబిరెడ్డి సోదరి ఉమాదేవి పేర ఆ లీగల్ నోటీసు వర్మ కార్యాలయానికి చేరింది. ఓబిరెడ్డిని విలన్ గా చిత్రీకరించారని, రెండు దృశ్యాల్లో ఓబిరెడ్డిని రేపిస్టుగా చూపించారని ఆ లీగల్ నోటీసులో ఆరోపించారు. రక్త చరిత్ర మూడు కుటుంబాలకు చెందిన ఇతివృత్తానికి చెందిన సినిమా అని, వర్మ రెండు కుటుంబాల వారిని మాత్రమే సంప్రదించారని, తమను సంప్రదించలేదని ఓబిరెడ్డి కుటుంబ సభ్యులు ఆరోపిస్తున్నారు.

కాగా, తన వారిలో ఓబిరెడ్డి వర్గానికి చెందనవారెవరూ లేరని, వర్మను బెదిరిస్తుందని తన మనుషులు కారని పరిటాల రవి హత్య కేసులో నిందితుడు మద్దెల చెర్వు సూరి అన్నారు. బెదిరింపులు సరి కాదని, సమస్యలుంటే చర్చల ద్వారా పరిష్కరించుకోవాలని ఆయన అన్నట్లు ఓ తెలుగు టీవీ చానెల్ తెలిపింది. మద్దెలచెర్వు సూరిని, పరిటాల రవిని సినిమాలో హీరోలుగా చూపుతూ ఓబిరెడ్డిని మాత్రం రామ్ గోపాల్ వర్మ రక్త చరిత్రలో విలన్ గా చూపించారని ఓబిరెడ్డి కుటుంబ సభ్యులు ఆరోపిస్తున్నారు.