వైయస్ జగన్ సోనియానూ పార్టీనీ ధిక్కరించలేదు: మల్లు భట్టి విక్రమార్క

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ తాను పార్టీ అధ్యక్షురాలు సోనియా గాంధీని గానీ పార్టీ అధిష్టానాన్ని గానీ ధిక్కరిస్తున్నట్లు చెప్పలేదని ప్రభుత్వ చీఫ్ విప్ మల్లు భట్టి విక్రమార్క అన్నారు. వైయస్ జగన్ ధిక్కారానికి దిగితే అధిష్టానం చర్యలు తీసుకుంటుందని ఆయన ఆదివారం మీడియా ప్రతినిధులతో అన్నారు. వైయస్ జగన్ తన ఓదార్పు యాత్ర వ్యక్తిగతమని చెప్పారని ఆయన గుర్తు చేశారు.

పార్టీ శాసనసభ్యులు, పార్లమెంటు సభ్యులు, కార్యకర్తలు అందరూ పార్టీని, సోనియాను బలపరిచేవారే అని ఆయన అన్నారు. పార్టీ విధానాలకు లోబడే అందరూ వ్యవహరిస్తారని ఆయన అన్నారు. ఈ మీడియా ప్రతినిధుల సమావేశంలో పాల్గొన్న ప్రభుత్వ విప్ శైలజానాథ్ చంద్రబాబుపై తీవ్ర వ్యాఖ్యలు చేశారు. తెలంగాణో, సీమాంధ్రనో చంద్రబాబు తేల్చుకోలేకపోతున్నారని ఆయన విమర్శించారు.