బెదిరింపులకు భయపడేది లేదు: రక్తచరిత్ర డిస్ట్రిబ్యూటర్ కళ్యాణ్

హైదరాబాద్: తమకు వస్తున్న బెదిరింపులకు భయపడేది లేదని రక్త చరిత్ర సినిమా డిస్ట్రిబ్యూటర్ కళ్యాణ్ అన్నారు. తమకు ఎదురయ్యే ఇబ్బందులను ఎదుర్కుంటామని ఆయన ఆదివారం ఓ టీవీ చానెల్ ప్రతినిధితో అన్నారు. తాము ఎదుర్కోలేనప్పుడు పోలీసులకు ఫిర్యాదు చేస్తామని ఆయన చెప్పారు. ముందు నిర్ణయించుకున్న ప్రకారం సెప్టెంబర్ 12వ తేదీన అనంతపురంలోనే రక్త చరిత్ర ఆడియో విడుదల కార్యక్రమం ఉంటుందని ఆయన చెప్పారు. సినిమా నిర్మాణం ప్రారంభించినప్పుడే ఇబ్బందులు వస్తాయని అనుకున్నామని ఆయన అన్నారు.

రామ్ గోపాల్ వర్మకే కాకుండా తనకు కూడా బెదిరింపు కాల్స్ వచ్చాయని ఆయన చెప్పారు. సినిమాలో తమను చెడుగా చూపించారని ఎవరికి వారే అనుకుంటున్నారని, అలా అనుకోవడంపై తానేమీ వ్యాఖ్యనించదలుచుకోలేదని ఆయన అన్నారు. తమ సినిమా విడుదలపై వ్యతిరేకత ప్రదర్శిస్తున్నవారిని సానుకూలంగా మార్చుకోగలమనే నమ్మకం తనకు ఉందని ఆయన చెప్పారు.