సత్యం రాజు బెయిల్ రద్దుకు సుప్రీంకు సిబిఐ విజ్ఞప్తి

న్యూఢిల్లీ/హైదరాబాద్: రామలింగ రాజు సహా సత్యం కంప్యూటర్స్ కుంభకోణం కేసు నిందితులు రామరాజు, శ్రీనివాస్‌, రామకృష్ణ మరో ఇద్దరి బెయిల్‌ రద్దుకు సుప్రీంకోర్టులో సిబిఐ సోమవారం పిటిషన్‌ను దాఖలు చేసింది. దీనిపై సమాధానం చెప్పాలంటూ రామలింగరాజు సహా బెయిలు పొందినవారందరికీ న్యాయస్థానం నోటీసులు జారీ చేసింది. సీబీఐ పిటిషన్‌పై విచారణను సుప్రీంకోర్టు రెండు వారాలపాటు వాయిదా వేసింది.

కాగా సత్యం కేసు విచారణను హైదరాబాదులోని నాంపల్లి ప్రత్యేక కోర్టు మంగళవారానికి వాయిదా వేసింది. కేసు విచారణ నిమిత్తం రామలింగరాజు సహా 10 మంది నిందితులు కోర్టుకు హాజరయ్యారు. సత్యం కంప్యూటర్స్ మాజీ చైర్మన్ కు హైకోర్టు ఇటీవల బెయిల్ మంజూరు చేసిన విషయం తెలిసిందే. బెయిల్ ఇస్తే రామలింగరాజు సాక్షులను ప్రభావితం చేసే అవకాశం ఉందని సిబిఐ అభ్యంతరం చెబుతోంది.