చంద్రబాబు బయ్యారం యాత్రకు తెలంగాణవాదుల భయం

ఖమ్మం: తెలుగుదేశం పార్టీ అధ్యక్షుడు నారా చంద్రబాబు నాయుడు బయ్యారం యాత్రకు తెలంగాణవాదుల నుంచి ఆటంకాలు ఎదురవుతాయనే భయం పట్టుకుంది. అక్రమ మైనింగ్ పై పోరులో భాగంగా తెలుగుదేశం పార్టీ ఖమ్మం జిల్లా బయ్యారంలో సోమవారం ధర్నా చేపట్టింది. ఈ ధర్నాలో చంద్రబాబు పాల్గొంటున్నారు. చంద్రబాబును తెలంగాణవాదులు అడ్డుకుంటారనే ఉద్దేశంతో పోలీసులు ముందస్తు అరెస్టులకు సిద్ధపడ్డారు. తెలంగాణ రాష్ట్ర సమితి (తెరాస) మండల స్థాయి నాయకులను, కార్యకర్తలను ఇప్పటికే పోలీసులు అదుపులోకి తీసుకున్నారు.

వరంగల్ జిల్లా మహబూబాబాద్ ప్రాంతంలో కూడా అరెస్టులు జరిగాయి. పోలీసులు 15 మందిని ముందు జాగ్రత్త చర్యగా అరెస్టు చేశారు. బయ్యారం ఖమ్మం జిల్లాలోనే ఉన్నప్పటికీ వరంగల్ జిల్లాకు ఆనుకుని ఉంటుంది. దీంతో వరంగల్ జిల్లాలోనూ అరెస్టులు సాగుతున్నాయి. బయ్యారం ప్రాంతంలో చంద్రబాబుకు భద్రతగా భారీగా పోలీసులు మోహరించారు.