అలాగైతే వైయస్ జగన్ పై వేటు తప్పదు: దానం నాగేందర్

హైదరాబాద్: తమ కాంగ్రెసు పార్టీ అధిష్టానాన్ని ధిక్కరిస్తూ కడప పార్లమెంటు సభ్యుడు వైయస్ జగన్ ఓదార్పు యాత్రను కొనసాగితే వేటు తప్పదని రాష్ట్ర ఆరోగ్య శాఖ మంత్రి దానం నాగేందర్ అన్నారు. జగన్ తో పాటు ఆయన వెంట ఉన్నవారిపై కూడా అధిష్టానం వేటు వేస్తుందని నాగేందర్ సోమవారం మీడియా ప్రతినిధుల సమావేశంలో అన్నారు. జగన్ తనకు సోదరుడిలాంటివాడని, అందుకే తాను ఈ విషయం మాట్లాడుతున్నానని ఆయన అన్నారు. ఓదార్పు యాత్రను ఆపి తమ పార్టీ అధ్యక్షురాలు సోనియాను కలిసి ఆమె సూచన మేరకు నడుచుకోవాలని ఆయన జగన్ కు సలహా ఇచ్చారు.

చెప్పుడు మాటలు విని భవిష్యత్తును పాడుచేసుకోవద్దని కూడా ఆయన జగన్ కు సూచించారు. కొంత మంది వైయస్ జగన్ ను చెడగొడుతున్నారని ఆయన అభిప్రాయపడ్డారు. అధిష్టానం సూచన మేరకు నడుచుకుని తండ్రిని మించిన తనయుడని జగన్ అనిపించుకోవాలని ఆయన అన్నారు. దివంగత నేత వైయస్ రాజశేఖర రెడ్డి ఏ రోజు కూడా అధిష్టానాన్ని ధిక్కరించలేదని ఆయన చెప్పారు. ముఖ్యమంత్రిగా రోశయ్య పదవి చేపట్టి ఏడాది పూర్తవుతున్న సందర్భంగా సెప్టెంబర్ 3వ తేదీన పునరంకిత సభ నిర్వహించనున్నట్లు ఆయన తెలిపారు.