ఒయు హాస్టళ్లపై అర్ధరాత్రి పోలీసు దాడులు: అరెస్టులు, ఉద్రిక్తత

హైదరాబాద్‌: సీమాంధ్ర అధ్యాపకులపై దాడి చేసిన నిందితులను అరెస్టు చేసేందుకు పోలీసులు ఆదివారం అర్ధరాత్రి పోలీసుుల ఉస్మానియా విశ్వవిద్యాలయం హాస్టళ్లపై దాడులు నిర్వహించారు. దీంతో ఉస్మానియా విశ్వవిద్యాలయంలో ఉద్రిక్తత నెలకొంది. రాత్రి రెండు గంటల ప్రాంతంలో పోలీసులు నిందితులను అరెస్టు చేసేందుకు ప్రయత్నించారు.దీన్ని గమనించిన విద్యార్థులు పోలీసులను అడ్డుకున్నారు.

విద్యార్థులు రోడ్డుపైకి వచ్చి ఆందోళనకు దిగారు. పరిస్థితి శృతి మించుతోందని భావించిన పోలీసులు వెనక్కి వెళ్లిపోవడంతో ఆందోళన సద్దుమణిగింది. విశ్వవిద్యాలయంలోకి అనుమతి లేకుండా పోలీసులు రావడం పట్ల విద్యార్థులు ఆగ్రహం వ్యక్తం చేశారు. కొంత మంది విద్యార్థులను పోలీసులు ఎట్టకేలకు అరెస్టు చేశారు. విశ్వవిద్యాలయం అధికారుల అనుమతి లేకుండా పోలీసులు హాస్టళ్లపై దాడులు చేయడాన్ని తెలంగాణ విద్యార్థి జెఎసి నాయకులు విమర్శిస్తున్నారు. ఈ దాడిని సీమాంధ్ర కుట్రగా జెఎసి నేత సుమన్ ఆరోపించారు.