ఎమ్మెల్యేలకు రాహుల్ ఫోన్: వైయస్ జగన్ ఓదార్పు కట్టడి

ఒంగోలు: తమ పార్టీ కడప పార్లమెంటు సభ్యుడు వైయస్ జగన్ ఓదార్పును కట్టడి చేసేందుకు ఎఐసిసి ప్రధాన కార్యదర్శి, కాంగ్రెసు అధ్యక్షురాలు సోనియా గాంధీ కుమారుడు రాహుల్ గాంధీ స్వయంగా రంగంలోకి దిగినట్లు తెలుస్తోంది. ప్రకాశం జిల్లాలో జరిగే ఓదార్పు యాత్రకు శాసనసభ్యులు వెళ్లకుండా ఆయన చర్యలు చేపడుతున్నారు. ఇందులో భాగంగా ఆయన కార్యాలయం నుంచి ప్రకాశం జిల్లా పార్టీ శాసనసభ్యులకు ఫోన్ కాల్స్ వచ్చినట్లు తెలుస్తోంది.

పార్టీ అధిష్టానం పచ్చ జెండా ఊపకపోతే జగన్ ఓదార్పు యాత్రలో పాల్గొనకూడదని ప్రకాశం జిల్లా కాంగ్రెసు శాసనసభ్యులు నిర్ణయించుకున్నారు. రాహుల్ గాంధీ కార్యాలయం నుంచి ఫోన్ కాల్స్ రావడంతో వారికి కొంత ధైర్యం సమకూరినట్లు చెబుతున్నారు. జగన్ ఓదార్పు యాత్రలో పాల్గొనే విషయంపై ఆలోచిస్తానని కనిగిరి శాసనసభ్యుడు ఉగ్ర నరసింహా రెడ్డి అన్నారు.