ప్రకాశం జిల్లాలో వైయస్ జగన్ ఓదార్పు ఉంటుంది: బాలినేని శ్రీనివాస రెడ్డి

హైదరాబాద్‌: వైయస్ రాజశేఖర రెడ్డి మరణవార్త విని మృతి చెందిన కుటుంబాలకు ఏఐసీసీ ఆర్థిక సాయాన్ని ప్రకటించడాన్ని స్వాగతిస్తున్నామని భూగర్భగనుల శాఖ మంత్రి బలినేని శ్రీనివాసరెడ్డి తెలిపారు. ప్రకాశం జిల్లాలో జగన్‌ ఓదార్పు యాత్ర కొనసాగుతుందని ఆయన చెప్పారు. ఓదార్పు యాత్రలో పాల్గొనాలని ఎమ్మెల్యేలు, నాయకుల్ని బలవంతపెట్టడం లేదని ఆయన బుధవారం మీడియా ప్రతినిధులతో అన్నారు.

ఈనెల 3న ఓదార్పుయాత్రలో పాల్గొని మంత్రిమండలి సమావేశానికి వెళ్తానని బాలినేని వెల్లడించారు. ప్రకాశం జిల్లాలో 15 రోజుల పాటు ఓదార్పు యాత్ర సాగుతుందని ఆయన చెప్పారు. ప్రకాశం జిల్లాలో ఓదార్పు యాత్రకు బాలినేని శ్రీనివాస రెడ్డే ఏర్పాట్లు చేస్తున్నారు. ఓదార్పు యాత్రలో పాల్గొనవద్దని ముఖ్యమంత్రి చెప్పినా ఆయన వినడం లేదు.