తిరుపతి వేదికగా హైకమాండ్ పై జగన్ క్యాంప్ వార్ డిక్లేర్

తిరుపతి: తిరుపతి వేదికగా కడప పార్లమెంటు సభ్యుడు వైయస్ జగన్ కాంగ్రెసు పార్టీ హై కమాండ్ పై వార్ డిక్లేర్ చేసింది. తిరుపతిలో ఏర్పాటైన వైయస్ రాజశేఖర రెడ్డి వర్ధంతి సభలో వైయస్ జగన్ వర్గం నాయకులు హైకమాండ్ పై యుద్ధం కొనసాగుతుందని తెలిపింది. వైయస్ ఆకస్మిక మృతికి మరణించినవారి కుటుంబాలకు ఎఐసిసి లక్ష రూపాయలు ఆర్థిక సాయం అందించినంత మాత్రాన జగన్ ఓదార్పు యాత్ర ఆగదని అంబటి రాంబాబు ప్రకటించారు. వైయస్ వర్దంతి సభలో ఆయన ఈ విషయం ప్రకటించారు. జగన్ ఓదార్పు యాత్ర ఆగుతుందనేకుంటే అది వారి మూర్ఖత్వమని ఆయన అన్నారు.

కాంగ్రెసు పార్టీతో సంబంధం లేకుండా వైయస్ జగన్ వర్గం తిరుపతిలో వైయస్ వర్ధంతి సభను ఏర్పాటు చేసింది. ఈ సభలో వక్తలు పార్టీ అధిష్టానంపై, పార్టీలోని జగన్ వ్యతిరేకులపై తీవ్ర వ్యాఖ్యలు చేశారు. ఈ సభలో టిటిడి మాజీ చైర్మన్ భూమన కరుణాకర్ రెడ్డి కూడా పాల్గొన్నారు. దీన్ని బట్టి ఈ నెల 3వ తేదీ శుక్రవారం నుంచి ప్రకాశం జిల్లాలో జగన్ ఓదార్పు యాత్ర కొనసాగుతుందని అర్థమవుతోంది. ఓదార్పు యాత్రపై వైయస్ జగన్ అధిష్టానం మాటను బేఖాతరు చేయడానికే సిద్ధపడినట్లు కూడా అర్థం చేసుకోవచ్చు.