రక్త చరిత్ర సినిమాను అడ్డుకుంటాం: పవన్ కళ్యాణ్ ఫ్యాన్స్

హైదరాబాద్: రామ్ గోపాల వర్మ సినిమా రక్త చరిత్ర మరో వివాదంలో చిక్కుకుంది. ఆ సినిమాపై పవర్ స్టార్ పవన్ కళ్యాణ్ అభిమానులు నిప్పులు చెరుగుతున్నారు. పవన్ కళ్యాణ్ కు గుండు గీయించిన సీన్ సినిమాలో ఉంటే సహించబోమని వారు రామ్ గోపాల్ వర్మను హెచ్చరించారు. ఆ సీన్ ఉంటే స్క్రీన్లు చించేస్తామని వారు ఓ ప్రముఖ టీవి చానెల్ ప్రతినిధితో అన్నారు. సినిమా ప్రదర్శనను అడ్డకుంటామని వారు చెప్పారు. హత్యకు గురైన పరిటాల రవి ఓ భూ వివాదంలో పవన్ కళ్యాణ్ కు గుండు గీయించి అప్పట్లో వార్తలు వచ్చాయి. దీనిపై పవన్ కళ్యాణ్ ఆ వార్తాకథనం ప్రచురించిన పత్రికా కార్యాలయం వద్ద ప్రదర్శనకు దిగారు.

కాగా, పవన్ కళ్యాణ్ కొమరం పులి 9వ తేదీన విడుదలయ్యే అవకాశం ఉందని ప్రముఖ నిర్మాత అల్లు అరవింద్ చెప్పారు. ఆ సినిమా విడుదల కోసం అభిమానుల మాదిరిగానే తాను ఎదురు చూస్తున్నానని ఆయన చెప్పారు. రీరికార్డింగ్ వల్ల విడుదలలో జాప్యం జరిగిందని ఆయన చెప్పారు. కొమరం పులి హక్కులను తాను కొన్నట్లు వచ్చిన వార్తల్లో నిజం లేదని ఆయన చెప్పారు. నిర్మాతనే ఆ సినిమాను విడుదల చేసుకుంటున్నట్లు ఆయన తెలిపారు.