రాజశేఖర్, జీవితలకు బెదిరింపులు: చిరంజీవి ఫ్యాన్ అరెస్టు

హైదరాబాద్: హీరో రాజశేఖర్, జీవిత దంపతులకు బెదిరింపులు వచ్చిన కేసులో పోలీసులు ప్రజారాజ్యం పార్టీ అధ్యక్షుడు చిరంజీవి అభిమానిని అరెస్టు చేశారు. తూర్పు గోదావరి జిల్లా ఉప్పలగుప్తం మండలం నల్లవెళ్లి గ్రామానికి చెందిన నాగదుర్గా రంగప్రసాద్ (21) అనే యువకుడి హైదరాబాదులోని జూబ్లీహిల్స్ పోలీసులు గురువారం అరెస్టు చేశారు. అతను చిరంజీవికి వీరాభిమాని. చిరంజీవి బ్లడ్ బ్యాంక్ కు కనీసం 20 సార్లు రక్తదానం చేశాడు.

చిరంజీవి బ్లడ్ బ్యాంక్ పై జీవిత, రాజశేఖర్ దంపతులు తీవ్ర ఆరోపణలు చేశారు. దీంతో వారిద్దరికి అసభ్య పదజాలంతో బెదిరిస్తూ ఎస్ఎంఎస్ లు వచ్చాయి. దానిపై జీవిత, రాజశేఖర్ దంపతులు జూబ్లీహిల్స్ పోలీసులకు ఫిర్యాదు చేశారు. దీంతో పోలీసులు దర్యాప్తు చేసి రంగప్రసాద్ ను అరెస్టు చేశారు. అతన్ని రిమాండ్ కు తరలించారు.