అమెరికాలోని లూసియానాలో ఆంధ్ర విద్యార్థి మృతి

విశాఖపట్నం: అమెరికాలోని లూసియానాలో వీకెండ్ షికారులో విషాదం చోటు చేసుకుంది. పడవ షికారులో ఆంధ్ర విద్యార్థి దుర్మరణం పాలయ్యాడు. శనివారంనాడు పడవ షికారు చేస్తూ ప్రమాదవశాత్తు నీటిలో పడి జోసెఫ్ అనే విద్యార్థి మరణించాడు. జోసెఫ్ మరణించిన విషయం విశాఖపట్నంలోని ఆయన తల్లిదండ్రులకు అందింది. జోసెఫ్ కుటుంబంలో విషాద ఛాయలు నెలకొని ఉన్నాయి.

జోసెఫ్ గత నెల విశాఖపట్నం వచ్చి నెల రోజుల పాటు ఉన్నాడు. అతను తిరిగి అమెరికాకు వెళ్లి నెల రోజులు మాత్రమే అవుతోంది. నెలలోగానే ఈ విషాద వార్త వినాల్సి రావడంతో జోసెఫ్ కుటుంబ సభ్యులు కన్నీరుమున్నీరవుతున్నారు. జోసెఫ్ అమెరికాలోని లూసియానాలో ఎంఎస్ రెండో సంవత్సరం చదువుతున్నాడు.