విద్యార్థుల జీవితాలతో చెలగాటం ఆడవద్దు: లగడపాటి రాజగోపాల్

విజయవాడ: విద్యార్థుల జీవితాలతో చెలగాటం ఆడవద్దని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ తెలంగాణ రాజకీయ నాయకులకు విజ్ఞప్తి చేశారు. ఎపిపిఎస్సీ చైర్మన్ వెంకట్రామిరెడ్డిని సాకుగా చూపి ఎపిపిఎస్సీ గ్రూప్ వన్ పరీక్షను వాయిదా వేయాలని డిమాండ్ చేయడం సరి కాదని ఆయన ఆదివారం మీడియా ప్రతినిధులతో అన్నారు. తెలంగాణ రాజకీయ నాయకులు, విద్యార్థులు విజ్ఞతతో వ్యవహరించాలని ఆయన కోరారు.

ఎపిపిఎస్సీ చైర్మన్ గా వెంకట్రామిరెడ్డి వచ్చే ఏడాది ఫిబ్రవరిలో రిటైర్ అవుతారని, గ్రూప్ వన్ మెయిన్ పరీక్ష, ఇంటర్వ్యూలు జూన్ జులై నెలల్లో జరుగుతుందని, అందువల్ల వాటిలో వెంకట్రామిరెడ్డి ప్రమేయం ఉండదని ఆయన అన్నారు. ఈ స్థితిలో వెంకట్రామిరెడ్డిని సాకుగా చూపి గ్రూప్ వన్ ప్రిలిమినరీ పరీక్షను అడ్డుకోవడం సరి కాదని ఆయన అన్నారు.