చంద్రాబబు మొట్టికాయలు: నాగం జనార్దన్ రెడ్డి బేఖాతరు

హైదరాబాద్: తెలంగాణ ప్రాంతానికి చెందిన పార్టీ సీనియర్ నేత నాగం జనార్ధన్ రెడ్డికి తెలుగుదేశం పార్టీ అధినేత చంద్రబాబు నాయుడు మొట్టికాయలు వేసినట్లు సమాచారం. ఇష్టం వచ్చినట్లు మాట్లాడవద్దని ఆదేశించినట్లు తెలుస్తోంది. శనివారంనాటి పోలిట్ బ్యూరో సమావేశంలో ఇది జరిగినట్లు తెలుస్తోంది. అయినా నాగం జనార్దన్ రెడ్డి చంద్రబాబు ఆదేశాలను బేఖాతరు చేశారు. ఎపిపిఎస్సీ గ్రూప్ వన్ పరీక్షకు నిరసనగా తలపెట్టిన బంద్ కు నాగం జనార్దన్ రెడ్డి మద్దతు ప్రకటించారు. పోలిట్ బ్యూరో సమావేశానికి సీమాంధ్ర, తెలంగాణ ప్రాంతాలకు చెందిన నేతలంగా హాజరయ్యారు. ఆ సమయంలో ఇరు ప్రాంతాలకు చెందిన నేతలు ఇష్టానుసారంగా మీడియా ముందు మాట్లాడరాదని చంద్రబాబు కోరారు.

సీనియర్ నేత నాగం జనార్ధన్ రెడ్డికి బాబు ప్రత్యేకంగా క్లాస్ తీసుకున్నట్టు సమాచారం. తెలంగాణ రాష్ట్ర ఏర్పాటు విషయంలో ఆయన అధినేతను ధిక్కరించే రీతిలో మీడియా ముందు బహిరంగ వ్యాఖ్యలు చేస్తున్నారని, దీనివల్ల సీమాంధ్రలో పార్టీ నష్టపోయే పరిస్థితి ఉందని పలువురు సీమాంధ్ర నేతలు చంద్రబాబు దృష్టికి తీసుకెళ్లారు. తెలంగాణ ప్రాంత నేతలు ఎంత రెచ్చగొట్టినా తాము మౌనం వహిస్తుంటే నాగం మాత్రం తమ మనోభావాలతో పాటు అధ్యక్షుడి ఆదేశాలను ఖాతరు చేయడం లేదని వారు ఆరోపించారు. ఇదే అంశంపై నాగంను చీవాట్లు పెట్టినట్టు సమాచారం. నోటికి ఇష్టమొచ్చినట్టు మాట్లాడటం మానుకోవాలని సూచించారు.