గుంటూరు జిల్లాలో బట్టలిప్పేసి నిరసన తెలిపిన రైతు

గుంటూరు: అక్రమంగా లాక్కున్న తన పొలాన్ని ఇప్పించాలని చెప్పులు అరిగేలా తిరిగినా న్యాయం జరగడం లేదంటూ ఓ రైతు తహసీల్దారు కార్యాలయం ఎదుట నగ్నంగా నిరసన తెలిపిన ఘటన గుంటూరు జిల్లా అచ్చంపేట మండలంలో చోటుచేసుకుంది. అచ్చంపేట మండలానికి చెందిన రావూరి చెంద్రయ్య 1985లో కూనగోడ వెంకయ్య దగ్గర నాలుగు ఎకరాల పొలాన్ని కొన్నాడు. అనంతరం కొన్నాళ్లకు వెంకయ్య అల్లుళ్లు ఆ పొలాన్ని ఆక్రమించుకున్నారు.

ఈ విషయమై న్యాయంకోసం తహసీల్దారు కార్యాలయం చుట్టూ కొన్నేళ్లుగా తిరుగుతున్నప్పటికీ ఫలితం లేకపోవడంతో విసుగు చెందిన చెంద్రయ్య తహసీల్దారు కార్యాలయం ఎదుట నగ్నంగా నిరసన తెలిపాడు. స్థానికులు, అధికారులు అతడికి నచ్చజెప్పి దుస్తులు వేశారు.