వైయస్ జగన్ పై హై కమాండ్ చర్యలుండవన్న సాక్షి డైలీ

హైదరాబాద్: ఓదార్పు యాత్ర చేస్తున్న కడప పార్లమెంటు సభ్యుడు వైయస్ జగన్ పై కాంగ్రెసు అధిష్టానం చర్యలు తీసుకోదని సాక్షి డైలీ అంటోంది. పిటిఐ వార్తా సంస్థ ఎఐసిసి వర్గాలను ఉటంకిస్తూ ఆ వార్తను రాసినట్లు ఆ పత్రిక రాసింది. జగన్ ఓదార్పు యాత్ర భావోద్వేగపరమైన అంశమని ఎఐసిసి వర్గాలు అభిప్రాయపడ్డాయని చెబుతోంది. జగన్ ఓదార్పుపై ఓర్పు వహించాలని కాంగ్రెసు హై కమాండ్ నిర్ణయించుకుందట. తండ్రి వైయస్ రాజశేఖర రెడ్డి అకాల మరణం జగన్ కు భావోద్వేగపరమైన అంశమన్న విషయం పార్టీకి తెలుసునని ఎఐసిసి వర్గాలు చెప్పినట్లు సాక్షి డైలీ రాసింది.

సాక్షి డైలీ కథనం ప్రకారం - వైయస్ జగన్ మరణం జగన్ కే కాదు పార్టీకి కూడా తీవ్ర నష్టమేనని ఎఐసిసి వర్గాలు పేర్కొన్నాయి. జగన్ కు హని చేయాలనో లేదా నష్టం చేయాలనో భావించడం లేదని, ఈ విషయంపై పార్టీ ఓర్పుతో వ్యవహరిస్తోందని వివరించాయి. జగన్ పక్కదోవ పట్టారని, పార్టీ చేపట్టాల్సిన ఓదార్పు యాత్రను జగన్ చేపట్టారని ఎఐసిసి వర్గాలు అభిప్రాయపడినట్లు పిటిఐ పేర్కొంది.