నవ వసంతం హీరో మురళీ గుండెపోటుతో కన్నుమూత

చెన్నై: నవ వసంతం, హృదయం సినిమాలతో తెలుగు ప్రేక్షకులకు సుపరిచితుడైన తమిళ నటుడు మురళి మంగళవారం అర్ధరాత్రి కన్నుమూశారు. గుండెపోటుతో ఆయన చెన్నైలోని ఓ ఆస్పత్రిలో తుది శ్వాస విడిచారు. ఆయన వయస్సు 46 ఏళ్లు. ఆయనకు భార్య శోభ, ఇద్దరు కుమారులు, ఓ కూతురు ఉన్నారు. తెలుగు, తమిళం, కన్నడ సినిమాల్లో ఆయన 70కి పైగా సినిమాల్లో నటించారు. ఆయన 1964లో కర్నాటక రాష్ట్రంలో జన్మించారు.

పూవిళ్లంగాతో ఆయన సినీ రంగ ప్రవేశం చేశారు. ఆయన మృతికి తమిళ సినీ రంగం తీవ్ర సంతాపం వ్యక్తం చేసింది. ఆయన 1990ల్లో సిమ్రాన్, రోజా, లైలా, రంభ వంటి హీరోయిన్లతో కలిసి నటించారు. ఆయన కుమారుడు ఆధర్వ సినిమాల్లో తన భవిష్యత్తును వెతుక్కుంటున్నాడు. ఆయన 1984 నుంచి ఇప్పటి వరకు ఎడతెరిపి లేకుండా సినిమాల్లో నటిస్తున్నాడు. ఆయనకు తమిళనాడు ప్రభుత్వం నుంచి ఉత్తమ నటుడి అవార్డు కూడా లభించింది.