హెచ్చరికలపై చిరంజీవి ఆరోపణలు: ఒయు జెఎసి ఫైర్

తిరుపతి/హైదరాబాద్: ఉస్మానియా విశ్వవిద్యాలయం ఐక్య కార్యాచరణ కమిటీ (జెఎసి) నాయకులపై ప్రజారాజ్యం పార్టీ అధ్యక్షుడు చిరంజీవి తీవ్ర ఆరోపణలు చేశారు. ఉస్మానియా విశ్వవిద్యాలయంలో కొంత మంది తెలంగాణ రాష్ట్ర సమితి (తెరాస)వారున్నారని, వారు సినిమాలను అడ్డుకుంటామని బెదిరించి డబ్బులు వసూలు చేస్తున్నారని ఆయన ఆరోపించారు. తిరుపతి పర్యటనకు వచ్చిన ఆయన శుక్రవారం మీడియా ప్రతినిధులతో మాట్లాడారు. సినిమాలను అడ్డుకుంటామని బెదిరించి బ్లాక్ మెయిల్ చేస్తున్నారని ఆయన విమర్శించారు. తన సోదరుడు పవన్ కళ్యాణ్ సినిమా పులిని తెలంగాణలో అడ్డుకోవడం సరి కాదని ఆయన అన్నారు.

చట్టాన్ని తమ చెప్పుచేతల్లోకి తీసుకోవడం సరైంది కాదని ఆయన అన్నారు. ఒయులోని అందరినీ తాను తప్పు పట్టడం లేదని, కొంత మంది ఒయు జెఎసి పేరుతో బెదిరిస్తూ డబ్బులు దండుకుంటున్నారని ఆయన ఆరోపించారు. తమపై ఆరోపణలు చేసిన చిరంజీవిపై ఒయు జెఎసి నాయకులు తీవ్ర ఆగ్రహం వ్యక్తం చేశారు. తమ విశ్వసనీయతను దెబ్బ తీయడానికే చిరంజీవి తమపై ఆరోపణలు చేస్తున్నారని వారు విమర్శించారు. దమ్ముంటే తమపై చేసిన ఆరోపణలను రుజువు చేయాలని వారు చిరంజీవిని సవాల్ చేశారు.