వైయస్ జగన్ దేవుడు విధించే ఏ శిక్షకైనా అర్హుడేనన్న సోనియా

హైదరాబాద్: అధిష్ఠానాన్ని ధిక్కరిస్తూ కడప పార్లమెంటు సభ్యుడు జగన్మోహనరెడ్డి ఓదార్పుయాత్ర చేయడంపై కాంగ్రెస్‌ అధ్యక్షురాలుసోనియా మండిపడుతున్నారు. "దేవుడు విధించే ఎలాంటి శిక్షకైనా జగన్‌ అర్హుడే" (జగన్‌ డిజర్వ్‌డ్‌ ఎనీ పనిష్‌మెంట్‌ బై గాడ్‌) అంటూ కటువుగా వ్యాఖ్యానించినట్లు వార్తలు వచ్చాయి. కాంగ్రెస్‌ సీనియర్‌ నేత డీఎల్‌ రవీంద్రారెడ్డి, రాష్ట్ర శాసనసభ స్పీకర్‌ కిరణ్ ‌కుమార్‌ రెడ్డి, మాజీ ఎంపీ వల్లభనేని బాలశౌరి, మహిళా కాంగ్రెస్‌ నాయకురాలు ఉప్పల శారదలు సోనియాగాంధీని వేర్వేరుగా కలిశారు. అతని వ్యవహారంలో పార్టీ అధిష్ఠానం వూగిసలాట ప్రదర్శిస్తోందన్న వాదనను సోనియా ఖండించినట్లు సమాచారం. మీకూ, మీడియాకూ వూగిసలాట ఉందేమోకాని, తమకు ఎలాంటి సంశయాలులేవని, ఈ విషయంలో తాము చాలా స్పష్టమైన వైఖరితో ఉన్నామంటూ వ్యాఖ్యానించినట్లు తెలిసింది.

ముఖ్యమంత్రిగా బాగా డబ్బు (మింటెడ్‌ మనీ) సంపాదించుకున్నారని తెలిసీ కూడా రాజశేఖర రెడ్డి పార్టీకి చేసిన సేవలను దృష్టిలో ఉంచుకొని రెండుసార్లు ముఖ్యమంత్రిగా కొనసాగించామని, ఆ సమయంలో వైయస్సార్ అపరిమితమైన అధికారాన్ని చెలాయించారంటూ సోనియా ప్రస్తావించినట్లు సమాచారం. వైఎస్ ‌తోపాటు ఆయన కొడుకుగా జగన్‌ కూడా అపరిమితమైన అధికారాన్ని చెలాయించిన విషయం తమ దృష్టికి వచ్చిందని అధినేత్రి అన్నట్లు తెలిసింది. వైఎస్‌ కుటుంబానికి తాము ఇచ్చిన చేయూతను చూసి జగన్‌ జీవితాంతం కాంగ్రెస్ ‌కు రుణపడి ఉండాలని ఆమె ఆవేదనతో కూడిన స్వరంతో వ్యాఖ్యానించినట్లు సమాచారం. జగన్‌ పార్టీ పెట్టే ఆలోచనలో ఉన్నారంటూ రాష్ట్ర నాయకులు చెప్పినప్పుడు "డబ్బుంది కదా పార్టీ పెడతారు. చూద్దాం" అని సోనియా వ్యాఖ్యానించినట్లు తెలిసింది.