టిజి వెంకటేష్ కున్న అర్హతలేమిటో: తెరాస నేత హరీష్ రావు

హైదరాబాద్: కాంగ్రెసు కర్నూలు శాసనసభ్యుడు టిజి వెంకటేష్ పై తెలంగాణ రాష్ట్ర సమితి (తెరాస) నేత హరీష్ రావు తీవ్ర ఆగ్రహం వ్యక్తం చేశారు. టిజి వెంకటేష్ కు హైదరాబాద్ ఔటర్ రింగ్ రోడ్డులో కోట్లాది రూపాయల విలువైన భూములను ప్రభుత్వం కట్టబెట్టిందని, తెలంగాణ రైతులకు మాత్రం గుంట భూమి ఇవ్వలేదని ఆయన ఆదివారం మీడియా ప్రతినిధుల సమావేశంలో విమర్శించారు. టిజి వెంకటేష్ కున్న అర్హతలేమిటో, తెలంగాణ రైతులకు లేని అర్హతలేమిటని ఆయన అడిగారు. తమ పార్టీ అధ్యక్షుడు కెసిఆర్ ను, తెలంగాణను టిజి వెంకటేష్ అవమానించారని ఆయన అన్నారు.

భూముల బాగోతాలను బయటపడతాయనే టిజి వెంకటేష్ తెలంగాణను అడ్డుకుంటున్నారని ఆయన అన్నారు. టిజి వెంకటేష్ కు ఇచ్చిన భూములపై ప్రభుత్వం వివరణ ఇవ్వాలని ఆయన డిమాండ్ చేశారు. ఔటర్‌ రింగ్‌ రోడ్‌ భూముల వ్యవహారంపై ప్రభుత్వం శ్వేతపత్రం విడుదల చేయాలని హరీష్‌రావు డిమాండ్‌ చేశారు. ఔటర్‌ రింగ్‌ రోడ్డు, ఎమ్మార్‌ వ్యవహారంలో భూములు కోల్పోయినవారికి తక్షణమే భూములు కేటాయించాలని ఆయన అన్నారు. భూములు కోల్పోయినవారికి నష్టపరిహారం చెల్లించడంలో తెలంగాణవారికి అన్యాయం జరుగుతోందని విమర్శించారు. రైతులకు న్యాయం జరిగే వరకు పోరాటం చేస్తామని ఆయన చెప్పారు.