చిరంజీవీ!ముక్కు నేలకు రాస్తవా: కె. చంద్రశేఖర రావు

నల్గొండ: సమైక్యాంధ్ర అంటున్నవారి సినిమాలను చూడొద్దన్న ఉస్మానియా వర్సిటీ విద్యార్థుల ఆవేశంలో అర్థముందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నారు. చిరంజీవి విద్యార్థులను బ్లాక్‌ మెయిల్‌ చేస్తూ అవాకులు, చవాకులు మాట్లాడుతున్నాడని ఆయన విమర్శించారు. "అలా మాట్లాడేందుకు ఆయన(చిరంజీవి)కి ఎన్ని గుండెలు. ఉద్యమాన్ని అభాసుపాలు చేయడానికి నిప్పురవ్వల్లాంటి ఉస్మానియా విద్యార్థులపై బురద జల్లుతున్నాడు. దమ్ముంటే ఎవడు బ్లాక్‌ మెయిల్‌ చేశాడో..ఎవరు డబ్బులడిగారో బయటపెట్టు. ఆధారాలుంటే రుజువు చెయ్‌ లేదా ముక్కు నేలకు రాయి. అని ఉస్మానియా విద్యార్థులు అడుగుతున్నారు..నువ్వు సిద్ధమేనా" అని కెసిఆర్ చిరంజీవినుద్దేశించి మండిపడ్డారు. ఉద్యమాన్ని మలినం చేసేందుకు ప్రయత్నించొద్దని హితవు పలికారు. హైదరాబాద్ లోని తెలంగాణ భవన్ ‌లో ఆదివారం కరీంనగర్‌ జిల్లా పెద్దపల్లికి చెందిన ట్రినిటి విద్యాసంస్థల అధినేత డి.మనోహర్‌ రెడ్డి, నియోజకవర్గ పరిధిలోని పలువురు సర్పంచులు, ఎంపీటీసీ సభ్యులు తెరాసలో చేరారు. ఈ సందర్భంగా కెసిఆర్ మాట్లాడారు.

రాష్ట్రం విడిపోయిన తర్వాత కూడా ఇరుప్రాంతాల ప్రజల మధ్య సోదరభావం ఉండాలని తాము కోరుకుంటున్నామన్నారు. కానీ, చిరంజీవి లాంటి వారు రెచ్చగొట్టేలా వ్యాఖ్యలు చేస్తే ఎలాగని ప్రశ్నించారు. వరంగల్‌ జిల్లాకు చెందిన తెదేపా నేత ఒకరు తెరాసలోకి వస్తానన్నారని, కానీ, అంతలోనే ఆ జిల్లా తెదేపా ఎమ్మెల్యేలు ఆయన ఇంటికి వెళ్లి తెరాసలోకి వెళ్లొద్దని చెప్పారని కెసిఆర్ తెలిపారు. దమ్ముంటే చంద్రబాబును గొర్రెలా తీసుకెళ్లి శ్రీకృష్ణ కమిటీకి లేఖ ఇప్పించాలన్నారు. సీమాంధ్ర నేతలు హైదరాబాద్‌ గురించి అనవసర పేచీ పెడుతున్నారనీ, ఇలాగే మాట్లాడితే రేప్పొద్దున ఆంధ్రవారు సచివాలయం ఏర్పాటు చేసుకునేవరకు కూడా ఇక్కడ ఉండనిచ్చేది లేదంటూ హెచ్చరించారు. ఎంపీ మధుయాస్కీ బాధ్యతాయుతంగా మాట్లాడినా నీతి, జాతిలేని సీమాంధ్ర పెద్ద మనుషులు ఇష్టమున్నట్లు వ్యాఖ్యలు చేస్తున్నారని విమర్శించారు.