చంద్రబాబూ నీకు మగతనముంటే...!? రఘువీరా రెడ్డి సవాల్

హైదరాబాద్: "చంద్రబాబూ..నీకు మగతనముంటే..చేతనైతే...రైతులను అడ్డం పెట్టుకోకుండా తెలంగాణలో తిరుగు" అంటూ వ్యవసాయ మంత్రి రఘువీరా రెడ్డి సవాల్ విసిరారు. టీడీపీ అధ్యక్షుడు బాబు తెలంగాణ జిల్లాల్లో పర్యటించే దమ్ము లేకే ఎరువుల సమస్యను సాకుగా వాడుకుంటున్నారని ఆయన విమర్శించారు. "సీఎం దిగిపోవాలంటూ చంద్రబాబు మాటిమాటికీ విమర్శిస్తున్నారు. ఈ ప్రభుత్వం సమర్థంగా పని చేస్తోంది. అయినా, మీరు అక్కసుతో దిగిపొమ్మంటున్నారు. దిగిపోయి ఏంచేద్దాం? ఎన్నికలకు పోదామా? మీకు ధైర్యం ఉందా?" అని ప్రశ్నించారు. దయచేసి రైతులను రెచ్చగొట్టే ప్రయత్నాలు చేయొద్దని కోరారు. చంద్రబాబు హయాంలో విత్తనాలు, ఎరువులు కావాలని అడిగే దిక్కు కూడా లేదని ఎద్దేవా చేశారు.

"మహబూబ్‌నగర్ జిల్లాలో ఎరువుల లారీపైకి రైతులను రెచ్చగొట్టింది టీడీపీ ముసుగులో ఉన్న గూండాలే. గతంలో ఏవో కారణాలతో ఓ రైతు చనిపోతే...ఎరువులు దొరక్కే ఆత్మహత్య చేసుకున్నారంటే ఎలా? అనవసరంగా రైతుల్లో గందరగోళం సృష్టించకండి. అధికారంలో ఉన్నన్నాళ్లూ రైతుల ఉసురు పోసుకున్నావు. సర్వ నాశనం చేశావు. ఇప్పుడు మళ్లీ వారిని ఎందుకు నాశనం చేస్తావు?" అని రఘువీరా ప్రశ్నించారు. "మీ దరిద్ర పాలనలో కనీసం ఎరువులు కావాలని, రుణాలు ఇంకా కావాలని అడిగే దిక్కు కూడా లేదు కదా?" అని ఆయన విమర్శించారు. అలాగే రాష్ట్రంలో నాగార్జున ఫెర్టిలైజర్స్ కంపెనీ ద్వారా ఉత్పత్తయ్యే యూరియాను పూర్తిగా ఇక్కడి అవసరాలకే వాడుకుంటున్నామన్నారు. వ్యవసాయ శాఖ కమిషనరేట్‌లోని మానిటరింగ్ సెల్‌కు వచ్చిన మొత్తం 530 ఫిర్యాదులు పరిష్కరించామని రఘువీరా తెలిపారు.