వైయస్ జగన్ కళ్లకు వాపు: వైద్యులు చెప్పినా ఆగని ఓదార్పు

ఒంగోలు: ప్రకాశం జిల్లాలో ఓదార్పు యాత్ర సాగిస్తున్న కాంగ్రెసు కడప పార్లమెంటు సభ్యుడు వైయస్ జగన్ కళ్లకు ఇన్ ఫెక్షన్ సోకింది. దీంతో ఆయన రెండు కళ్లూ వాచాయి. జ్వరం కూడా వచ్చింది. పూలు కళ్లకు తగలడం వల్ల ఇన్ ఫెక్షన్ వచ్చినట్లు వైద్యులు చెప్పారు. దర్శిలోని మార్కెట్ యార్డు వైద్యులు జగన్ ను పరీక్షించారు. విశ్రాంతి తీసుకోవాలని వారు సలహా ఇచ్చారు. అయితే ఆయన వారి మాటను బేఖాతరు చేస్తూ యాత్రను కొనసాగిస్తున్నారు.

ప్రకాశం జిల్లాలో ఆయన ఓదార్పు యాత్ర మంగళవారం 12వ రోజుకు చేరుకుంది. ఆయన మంగళవారంనాడు దర్శి నుంచి తన యాత్రను ప్రారంభించారు. ప్రకాశం జిల్లాలో ఓదార్పు యాత్ర ముగిసిన తర్వాత ఆయన నెల్లూరులో ఓదార్పు యాత్రను సాగిస్తారు. అందుకు ఏర్పాట్లు జరుగుతున్నాయి.