హైకోర్టులో తెలంగాణ న్యాయవాదుల నిరాహార దీక్ష, ఉద్రిక్తత

హైదరాబాద్: న్యాయవ్యవస్థలోని ఉద్యోగాల్లో 42 శాతం వాటాను డిమాండ్ చేస్తూ ముగ్గురు న్యాయవాదుల నిరాహార దీక్షకు దిగారు. గత మూడు రోజులుగా వారు నిరాహార దీక్ష సాగిస్తున్నారు. ఈ నేపథ్యంలో మంగళవారం హైకోర్టు ఆవరణలో తీవ్ర ఉద్రిక్తత నెలకొని ఉంది. న్యాయవాదులు లోనికి వెళ్లకుండా తెలంగాణ న్యాయవాదులు అడ్డుకుంటున్నారు. హైదరాబాదులోని నాంపల్లి కోర్టులోనూ ఆందోళన సాగుతోంది. తెలంగాణ న్యాయవాదులు జై తెలంగాణ నినాదాలు చేస్తున్నారు.

హైకోర్టు నుంచి ర్యాలీ తీసేందుకు తెలంగాణ న్యాయవాదులు ప్రయత్నిస్తున్నారు. వారిని అడ్డుకునేందుకు పోలీసులు ప్రయత్నం చేస్తున్నారు. గత మూడు రోజులుగా తెలంగాణలోని న్యాయస్థానాల్లో తెలంగాణ న్యాయవాదులు ఆందోళన సాగిస్తున్నారు. న్యాయవ్యవస్థలోని ఉద్యోగాల్లో సీమాంధ్రులే ఎక్కువగా నియమితులయ్యారని తెలంగాణ న్యాయవాదులు విమర్శిస్తున్నారు.