కె చంద్రశేఖర రావుపై తొడ గొడుతున్న చంద్రబాబు నాయుడు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై తొడ గొడుతున్నారు. మహబూబ్ నగర్ జిల్లా పర్యటనలో తనపై రాళ్లతో జరిగిన దాడిని ఆయన తీవ్రంగా పరిగణిస్తున్నారు. తనపై కెసిఆర్ దాడి చేయించారనేది ఆయన ప్రధాన ఆరోపణ. తాను తెలంగాణ జిల్లాల్లో పర్యటించడం ఖాయమని ఆయన మొండికేసి చెబుతున్నారు. తెలంగాణలో పర్యటించే విషయంపై వెనక్కి తగ్గేది లేదని ఆయన అంటున్నారు. తెలంగాణలో తమకు బలమైన క్యాడర్ ఉందని, తాము తలుచుకుంటే కెసిఆర్ కు ఆ క్యాడర్ బుద్ధి చెబుతుందని ఆయన అంటున్నారు. ఇప్పటి వరకు తాము అటువంటి చర్యకు దిగలేదని ఆయన హెచ్చరిక ధోరణిలో వ్యాఖ్యానించారు.

మరోవైపు, కాంగ్రెసు కడప పార్లమెంటు సభ్యుడు వైయస్ జగన్ కు కూడా ఆయన తగిన జవాబు చెప్పేందుకు ప్రయత్నించారు. తన ఆస్తులపై వైయస్ జగన్ వర్గం చేస్తున్న ఆరోపణలను ఆయన తిప్పికొట్టే ప్రయత్నం చేశారు. వైయస్ జగన్ ఆస్తులతో తన అస్తులను పోల్చి చూస్తే తన ఆస్తులు లెక్కలోకి కూడా రావనే పద్ధతిలో మాట్లాడారు. తన ఆస్తుల విలువ మొత్తం 200 కోట్ల రూపాయలు చేస్తుందని, అందులోనూ ఎక్కువ భాగం తన రెండెకరాల భూమి విలువ మాత్రమే ఉంటుందని ఆయన అన్నారు. ధరలు తక్కువగా ఉన్నప్పుడు హైదరాబాద్ శివారులో కొన్న రెండెకరాల భూమి విలువ రియల్ ఎస్టేట్ బూమ్ వల్ల పెరిగిందని ఆయన అన్నారు. వైయస్ జగన్ కు వేల కోట్ల రూపాయల ఆస్తులున్నాయని ఆయన ఆరోపించారు.