కెసిఆర్ కు విరుగుడు: రేవంత్ రెడ్డికి తెలుగు యువత పగ్గాలు

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును పకడ్బందీగా ఎదుర్కోవడానికి తెలుగుదేశం పార్టీ అధ్యక్షుడు నారా చంద్రబాబు నాయుడు కొత్త పథకం వేశారు. తమపై దాడులు చేస్తున్న తెరాస కార్యకర్తలను తిప్పికొట్టేందుకు తెలుగు యువతను బలోపేతం చేసి, తగిన నాయకుడికి నేతృత్వ బాధ్యతలు అప్పగించాలని చంద్రబాబు చూస్తున్నట్లు చెబుతున్నారు. ఇందులో భాగంగా మహబూబ్ నగర్ జిల్లాకు చెందిన రేవంత్ రెడ్డికి తెలుగు యువత పగ్గాలు అప్పగించాలని ఆయన అనుకుంటున్నట్లు తెలుస్తోంది. కెసిఆర్ విమర్సలను తిప్పికొట్టడంలో రేవంత్ రెడ్డి నిర్వహిస్తున్న పాత్రకు చంద్రబాబు మురిసిపోయారని అంటున్నారు.

తెరాస కార్యకర్తలను ఎదుర్కోవడానికి అవసరమైన అంగ బలాన్ని సమకూర్చడంలో రేవంత్ రెడ్డి తగిన విధంగా వ్యవహరిస్తారని, దాని వల్ల ప్రతిచోటా తెలుగు యువత కార్యకర్తలను మోహరించి, తెలంగాణ ప్రాంతంలో తెలంగాణవాదులను తిప్పికొట్టేలా చూడాలని చంద్రబాబు భావిస్తున్నట్లు తెలుస్తోంది. అందుకు రేవంత్ రెడ్డి తగినవారని ఆయన దృష్టికి వచ్చిందని అంటున్నారు. అయితే, రేవంత్ రెడ్డి పార్టీ పొలిట్ బ్యూరోలో స్థానం కోసం పట్టుబడుతున్నట్లు చెబుతున్నారు.