నాగార్జునరెడ్డి రాజీనామాను తిరస్కరించిన ప్రధాన న్యాయమూర్తి

హైదరాబాద్: ఎట్టకేలకు జస్టిస్ నాగార్జునరెడ్డి రాజీనామాను ప్రధాన న్యాయమూర్తి కక్రూ తిరస్కరించారు. హైకోర్టులో గత నాలుగు రోజులుగా జరుగుతున్న సంఘటనల నేపథ్యంలో ఆయన తన రాజీనామా చేసిన విషయం తెలిసిందే. ఆయితే ఆయన రాజీనామాను తెలంగాణవాదులు ఒక నాటకంగా పేర్కొన్నారు. తెలంగాణ లాయర్ల దీక్షను భగ్నం చేయడానికే అయన ఈ చర్యలకు పాల్పడినట్లు వారు చెబుతున్నారు. నాగార్జునరెడ్డి తన రాజీనామాను అందచేసినప్పటి నుంచి హైకోర్టు ప్రధాన న్యాయమూర్తి నిసార్ అహ్మద్ కక్రూ నచ్చజెప్పేందుకు ప్రయత్నించారు. శుక్రవారు వారం సైతం రాజీనామా ఉపసంహరించుకోవాల్సిందిగా కక్రూ ఆయనపై తీవ్ర ఒత్తిడి చేశారు. అయినా ఆయన వినలేదు.

కాగా, రాష్ట్ర హైకోర్టు వద్ద పరిస్థితి ఉద్రిక్తంగా ఉంది. హైకోర్టులోకి ప్రవేశాన్ని పోలీసులు పరిమితం చేశారు. కేసులు ఉన్న న్యాయవాదులను మాత్రమే లోనికి అనుమతిస్తున్నారు. హైకోర్టు వద్ద దాదాపు 2 వేల మంది పోలీసులు మోహరించారు. సెప్టెంబర్ 17వ తేదీన న్యాయవాదులు ఆందోళన కార్యక్రమాలకు దిగవచ్చుననే ఉద్దేశంతో పోలీసులు జాగ్రత్తగా వ్యవహరిస్తున్నారు. హైకోర్టులో పరిస్థితిని మెరుగు పరచాలని, లేదంటే తీవ్రమైన చర్యలు తీసుకోవాల్సి ఉంటుందని హైకోర్టు కొలీజయం ప్రభుత్వాన్ని హెచ్చరించింది. హైకోర్టు కొలీజియం సమావేశమై పరిస్థితిని సమీక్షించింది.