కాంగ్రెసులో తెలంగాణ కలవరం: ప్రజాప్రతినిధులకు డి శ్రీనివాస్ లేఖ

హైదరాబాద్: తెలంగాణలోని పరిణామాల పట్ల కాంగ్రెసు పార్టీలో కలవరం చోటు చేసుకున్నట్లు కనిపిస్తోంది. వివిధ సంఘటనలపై సీమాంధ్ర, తెలంగాణ ప్రాంతాలకు చెందిన నాయకులు పరస్పరం విడిపోయి, విమర్శలు చేసుకుంటుండం పట్ల కాంగ్రెసు నాయకత్వం ఆందోళనకు గురైనట్లు తెలుస్తోంది. ఎపిపిఎఎస్సీ గ్రూప్ వన్ ప్రిలిమినరీ పరీక్ష, న్యాయవాదుల ఆందోళన, వైయస్సార్ హయాంలోని వ్యవహారాలు కాంగ్రెసు పార్టీని కుదిపేస్తున్నాయి. ఏ పరిణామాలు ఎటు దారి తీస్తాయో తెలియని అయోమయం నెలకొంది. ఈ స్థితిలో పార్టీకి నష్టం కలగకుండా చర్యలు తీసుకోవడంలో భాగంగా ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పార్టీ శాసనసభ్యులకు, పార్లమెంటు సభ్యులకు, ఎమ్మెల్సీలకు లేఖ రాశారు. తెలంగాణ సమస్యను తమ పార్టీ అధ్యక్షురాలు సోనియా గాంధీ పరిష్కరిస్తారని ఆయన చెప్పారు.

రాష్ట్రంలో ప్రస్తుతం నెలకొన్న పరిస్థితుల నేపథ్యంలో కాంగ్రెస్‌ నేతలు సంయమనం పాటించాలని డీఎస్‌ విజ్ఞప్తి చేశారు. తెలంగాణ ప్రాంత ఎంపీలు, ఎమ్మెల్యేలు, ఎమ్మెల్సీలకు వ్యక్తిగతంగా రాసిన లేఖల్లో ఆ విజ్ఞప్తి చేశారు. తెలంగాణ సమస్య పరిష్కారానికి కాంగ్రెస్‌ అధ్యక్షురాలు సోనియాగాంధీ కట్టుబడి ఉన్నారని డీఎస్‌ అందులో పేర్కొన్నారు. శ్రీకృష్ణ కమిటీ నివేదిక ఇచ్చే పనిలో ఉందని తెలిపారు. ఈ నేపథ్యంలో పార్టీ నేతల పరస్పర విమర్శలు, ప్రకటనలు ప్రాంతీయ ద్వేషాలు రగిల్చే విధంగా ఉన్నాయని ఆయన ఆవేదన వ్యక్తం చేశారు. పార్టీ నేతలు తమ అభిప్రాయాలను అంతర్గతంగా వెల్లడించాలి తప్ప, మీడియాకు ఎక్కి అనవసర విమర్శలు చేయవద్దని సూచించారు. ప్రస్తుత పరిస్థితుల్లో పార్టీ ప్రతిష్ఠను పెంచేందుకు అందరూ కృషి చేయాలని విజ్ఞప్తి చేశారు.