పురంధేశ్వరి విశాఖపట్నానికి చుట్టుచూపుగానే వస్తారట

విశాఖపట్నం: కేంద్ర మానవ వనరుల శాఖ మంత్రి దగ్గుబాటి పురంధేశ్వరి తీరును విశాఖపట్నం ప్రజారాజ్యం పార్టీ నాయకులు తీవ్ర తప్పు పడుతున్నారు. ఆమె ఉదయం విమానంలో విశాఖకు వచ్చి సాయంత్రం విమానంలో వెళ్లిపోతారని అంటున్నారు. ఈ మేరకు ప్రజారాజ్యం పార్టీ నాయకుడు గంటా శ్రీనివాస రావు పురంధేశ్వరికి ఇటీవల ఓ బహిరంగ లేఖ రాశారు. ప్రకాశం జిల్లాకు చెందిన పురంధేశ్వరి విశాఖపట్నం నియోజక వర్గం నుంచి లోకసభకు ఎన్నికైన విషయం తెలిసిందే. ప్రజా సమస్యలను పరిష్కరించడంపై పురంధేశ్వరికి దృష్టి లేదని ఆయన విమర్శించారు.

ఎన్నికల్లో నియోజకవర్గం ప్రజలకు ఇచ్చిన హామీలను పురంధేశ్వరి మరిచిపోయారని ఆయన అన్నారు. పురంధేశ్వరి సామర్థ్యంపై తనకు విశ్వాసం ఉందని అంటూనే ప్రజా సమస్యలను నిర్లక్ష్యం చేస్తున్నారని తప్పు పట్టారు. ప్రజల సమస్యలను పరిష్కరించడానికి ఆమె చేసింది శూన్యమని ఆయన అన్నారు. విశాఖపట్నానికి అంతర్జాతీయ హోదాను సంపాదించి పెట్టడంలో ఆమె పూర్తిగా విఫలమయ్యారని శ్రీనివాస రావు అన్నారు. రైళ్ల విషయంలో కూడా ఆమె న్యాయం చేయలేకపోయారని ఆయన అన్నారు. చిన్న చిన్న పనులు కూడా జరగడం లేదని ఆయన అన్నారు.