తన సొంత భవనం కూల్చివేతకు వైయస్ జగన్ ఆర్డర్

హైదరాబాద్: ప్రతిపక్ష నాయకుల నుంచి, తన సొంత పార్టీ నాయకుల నుంచి తీవ్ర ఆరోపణలు ఎదుర్కుంటున్న కాంగ్రెసు కడప పార్లమెంటు సభ్యుడు వైయస్ జగన్ తన సొంత ఇల్లు కూల్చివేతకు నడుం బిగించారు. హైదరాబాదు జూబిలీహిల్స్ లోని లోటస్ పాండ్ లో అత్యంత అధునాతనమైన సౌకర్యాలతో, అత్యంత విలాసంగా నిర్మిస్తున్న భవనాన్ని కొంత మేర కూల్చివేయాలని ఆయన అదేశించినట్లు సమాచారం.

బెంగళూర్ లోని అత్యంత విలాసవంతమైన నివాస భవనాన్ని పోలిన నివాస భవనాన్ని ఆయన హైదరాబాదులోనూ నిర్మిస్తున్నారు. అయితే, ఈ భవనాలు మీడియా దృష్టిని ఆకర్షించి తీవ్ర దుమారం రేపాయి. పైగా, నగర పాలక సంస్థ ఇచ్చిన అనుమతులను అతిక్రమించి ఆ భవనం నిర్మాణం జరుగుతున్నట్లు కూడా వార్తలు వచ్చాయి. ఈ నేపథ్యంలో నిబంధనల అతిక్రమణకు మించి ఉన్న భాగాలను కూల్చివేసేందుకు క్రేన్ లు రంగంలోకి దిగినట్లు సమాచారం. ముందు జాగ్రత్త చర్యగానే భవనంలోని కొన్ని భాగాల కూల్చివేతకు జగన్ ఆదేశాలు జారీ చేసినట్లు చెబుతున్నారు.