వైయస్ జగన్ కు డ్రగ్స్ పని చేయడం లేదా?

ఒంగోలు: ప్రకాశం జిల్లాలో ఓదార్పు యాత్రను తిరిగి కొనసాగించేందుకు కాంగ్రెసు కడప పార్లమెంటు సభ్యుడు చేస్తున్న ప్రయత్నాలేవీ ఫలించడం లేదని తెలుస్తోంది. కళ్లకు వచ్చిన ఇన్ ఫెక్షన్ ను త్వరగా తగ్గించుకోవడానికి ఆయన ఎక్కువ డోస్ వాడినట్లు సమాచారం. శుక్రవారం రాత్రి ఆయనకు కాస్తా నయంగానే కనిపించదట. అయినా, ఓదార్పు యాత్రను చేపట్టవద్దని వైద్యులు సలహా ఇచ్చినట్లు తెలుస్తోంది. బయటకు నయంగానే కనిపిస్తున్నప్పటికీ ఇన్ ఫెక్షన్ కు కారణమైన బాక్టీరియా తిరిగి దాడి చేయవచ్చునని అంటున్నారు.

మరిన్ని రోజులు యాంటీ బయాటిక్స్ తీసుకుంటూనే తగిన విశ్రాంతి కూడా తీసుకోవాలని వైద్యులు చెబుతున్నట్లు సమాచారం. లేకుంటే మరింతగా ఇన్ ఫెక్షన్ తిరగబడుతుందని చెబుతున్నారు. జగన్ ఆదివారం నుంచి గానీ సోమవారం నుంచి గానీ తన ఓదార్పు యాత్రను తిరిగి కొనసాగించాలని అనుకుంటున్నారు. అయితే, అది సాధ్యమవుతుందా అనేది కూడా అనుమానమేనని చెబుతున్నారు. కాగా, నెల్లూరు జిల్లాలో వెంటనే ఓదార్పు యాత్ర సాగించాలనే ఆయన ఆలోచన కార్యరూపం దాలుస్తుందా అనేది కూడా సందేహంగానే ఉంది.