వైయస్ జగన్ హై కమాండ్ నుంచి చర్యను కోరుకుంటున్నారా?

హైదరాబాద్: పార్టీ అధిష్టానం తనపై చర్య తీసుకోవాలని కాంగ్రెసు కడప పార్లమెంటు సభ్యుడు వైయస్ జగన్ కోరుకుంటున్నారా అనే ప్రశ్న ఉదయిస్తోంది. ఆయన ముఖ్య అనుచరుడు అంబటి రాంబాబు మాటలు ఆ ప్రశ్నకు తావిస్తున్నాయి. దమ్ముంటే వైయస్ జగన్ పై చర్య తీసుకోవాలని ఆయన పార్టీ అధిష్టానానికి సవాల్ విసిరారు. జగన్ అనుచరులపై చర్యలు తీసుకోవడం కాదు, జగన్ పై చర్య తీసుకోండి, చూద్దామనే పద్ధతిలో ఆయన మాట్లాడారు. ఒక రకంగా అంబటి రాంబాబు అధిష్టానాన్ని రెచ్చగొట్టడానికే ఆ ప్రకటన చేశారని భావిస్తున్నారు.

చర్య తీసుకుంటే తమ పని సులభమవుతుందని జగన్ వర్గం భావిస్తున్నట్లు తోస్తోంది. పార్టీ హైకమాండ్ చర్యలు తీసుకుంటే దండెత్తడానికి వీలు కలుగుతుందనేది ఆలోచన. చర్యలు తీసుకోకుండా బయటకు వెళ్లి సొంత కుంపటి పెట్టుకోవడానికి తగిన కారణం కనిపించదు. అంతేకాకుండా ప్రజల నుంచి సానుభూతి కూడా తక్కువగా లభించే అవకాశం ఉంది. అందువల్ల జగన్ పై సాధ్యమైనంత త్వరగా చర్యలు తీసుకుంటే మంచిదనే అభిప్రాయం జగన్ వర్గంలో ఉంది.