జగన్ కుటుంబసభ్యులపై వి.హనుమంతరావు రుసరుస

హైదరాబాద్: వైఎస్ జగన్ కుటుంబసభ్యులపై కాంగ్రెస్ సీనియర్ సభ్యుడు వి.హనుమంతరావు మరోసారి మండిపడ్డాడు. వైఎస్ రాజశేఖర్ రెడ్డి అధికారంలో ఉన్నప్పుడు ఆయన కుటుంబసభ్యులు అక్రమంగా వేలకోట్టు సంపాదించుకున్నారని, ఇప్పటికీ అలానే సంపాదించుకోవాలని చూస్తే ఎలా అంటూ మండిపడ్డారు. అప్పుడైతే తన వాళ్ళో అధికారంలో ఉన్నారని ఎవరూ ఏమీ చేయలేరని ఇష్టారాజ్యంగా ప్రజల సొమ్మును కొల్లగొట్టారన్నారు. ఐతే పాలన సజావుగా, సక్రమంగా సాగుతున్న రోశయ్య ప్రభుత్వ హయాంలో కూడా చేద్దామంటే కుదరదన్నారు. వైఎస్ లా అక్రమాలకు ఇప్పుడు ఎలాంటి అవకాశాలు లేవన్నారు. వైఎస్ జగన్, కడప మేయర్ రవీంద్రనాథ్ రెడ్డిలతో పాటు ఆయన కుటుంబ సభ్యుల అక్రమాలపై ఆధారాలు ఉన్నందునే పోలీసులు చర్యలు తీసుకుంటున్నారని, వారు ఖచ్చితంగా అక్రమాలకు పాల్పడ్డారని ఆయన వక్కాణించారు. వైఎస్ జగన్ సాక్షి, బయ్యారం, భారతి, సరస్వతితో పాటు కడప మేయరు రవీంద్రనాథ్ రెడ్డిల ఎరువుల కంపెనీలలో అక్రమాలు చోటు చేసుకున్న మాట నిజమని, అవి క్రమంగా బయటపడతాయని ఆయన అన్నారు.

వైఎస్ రాజశేఖరరెడ్డి మృతిని తట్టుకోలేక ఎవరూ మృతి చెందలేదన్న తన వ్యాఖ్యలపట్ల కట్టుబడి ఉన్నట్టు చెప్పాడు. 400 మంది మృతి చెందినట్టు జగన్ వర్గీయులు పేర్కొనడాన్ని ఆయన ఖండించారు. అయన మృతితో రాష్ట్రంలో ఎవరూ చావలేదని చెప్పారు.