లగడపాటి రాజగోపాల్ తో కె చంద్రశేఖర రావు మ్యాచ్ ఫిక్సింగ్?

హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ తో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఏకీభవించడంపై తీవ్ర దుమారం చెలరేగుతోంది. తెలంగాణ ప్రజా సంఘాలు కెసిఆర్ పై తీవ్రంగా మండిపడుతున్నాయి. పూర్వీకులు సీమాంధ్రకు చెందినవారి సంతానం తెలంగాణలో పుట్టి పెరిగితే స్థానికులే అవుతారని కెసిఆర్ చేసిన ప్రకటన ఆయనకు తలనొప్పి కలిగిస్తోంది. కెసిఆర్ మాటలను లగడపాటి రాజగోపాల్ సమర్థించారు. తెలంగాణలో పుట్టి పెరిగినా తల్లిదండ్రులు సీమాంధ్రులైతే వారు తెలంగావారు కారని తెలంగాణ న్యాయవాదుల జెఎసి అభిప్రాయపడుతోంది. కెసిఆర్ ప్రకటనపై తెలంగాణ ఎమ్మెల్సీ దిలీప్ కుమార్ కూడా తప్పు పట్టారు. ఉస్మానియా విశ్వవిద్యాలయం జెఎసి నాయకులు కెసిఆర్ పై ఫైర్ అయ్యారు.

మరఠ్వాడాకు చెంది హైదరాబాదులో పుట్టి పెరిగిన ఓ వ్యక్తికి తెలంగాణ న్యాయవాదులు ఇక్కడ ఉద్యోగం ఇవ్వకూడదని వాదించడం పట్ల కెసిఆర్ తీవ్ర ఆక్షేపణ తెలిపారు. కెసిఆర్ క్షమాపణ చెప్పాలని తెలంగాణ న్యాయవాదుల జెఎసి కన్వీనర్ ఎం రాజేందర్ రెడ్డి డిమాండ్ చేశారు. సీమాంధ్రులతో కెసిఆర్ కుమ్మక్కయ్యారని కాంగ్రెసు సీనియర్ నేత జి. వెంకటస్వామి విమర్శించారు. కెసిఆర్ తో తెలంగాణ రాదని ఆయన సోమవారం మీడియా ప్రతినిధులతో అన్నారు. మొత్తం మీద, కెసిఆర్ కు వ్యతిరేకంగా తెలంగాణలో తీవ్ర వివాదం తలెత్తింది.