అజరుద్దీన్ ఎపిసోడ్ : ఎవరో 'జ్వాల'ను రేపారు

హైదరాబాద్: ఎవరో జ్వాలను రేపితే మరెవరో బలయ్యారన్నట్లు, మాజీ క్రికెటర్, పార్లమెంటు సభ్యుడు మొహ్మద్ అజరుద్దీన్ ను దెబ్బ కొట్టడానికి చేసిన ప్రయత్నం బాడ్మింటన్ క్రీడాకారిణి జ్వాల జీవితంలో చిచ్చు పెట్టింది. బాడ్మింటన్ అసోయేషన్ ఎన్నికల్లో పోటీ చేయడానికి నిశ్చయించుకున్న అజర్ ను దెబ్బ తీయడానికి ప్రత్యర్థులు అజర్ కు, జ్వాలకు మధ్య వివాహేతర సంబంధం ఉన్నట్లు ప్రచారం సాగించారని చాలా ఆలస్యంగా తెలిసింది. ఆంధ్రప్రదేశ్ బాడ్మింటన్ అసోసియేషన్ లోని ఓ కీలక వ్యక్తి ఈ విషయంలో కీలక పాత్ర పోషించినట్లు ప్రచారం జరుగుతోంది.

బాడ్మింటన్ అసోసియేషన్ ఎన్నికల నుంచి అజర్ ను తప్పించడానికి ప్రత్యర్థులు ఆ ఎత్తు వేసినట్లు సమాచారం. నిజానికి, అజర్, జ్వాల కుటుంబాల మధ్య చాలా సన్నిహిత సంబంధాలున్నాయి. అప్పటికే వారింటికి వీరు పోవడం, వీరింటికి వారు రావడం సర్వసాధారణంగా జరుగుతున్న విషయం. దాన్ని అజర్ ప్రత్యర్థులు మరో విధంగా చిత్రీకరించారు. ప్రత్యర్థుల ప్రచారం వల్ల చేతన్ ఆనంద్ తో జ్వాల విడాకులు తీసుకోవాల్సిన పరిస్థితిని తెచ్చి పెట్టింది.