ఎమ్మార్ ప్రాపర్టీస్ పై లైవ్ ను స్మాష్ చేసిన అంబటి రాంబాబు

హైదరాబాద్‌: కాంగ్రెసు కడప పార్లమెంటు సభ్యుడు వైయస్ జగన్ ముఖ్య అనుచరుడు, ఎపిఐఐసి మాజీ చైర్మన్ అంబటి రాంబాబు టీవీ9 లైవ్ ప్రోగ్రామ్ లో ఏమీ తేల్చలేకపోయారు. 10 వేల కోట్ల రూపాయల కుంభకోణంలో తీవ్ర ఆరోపణలు ఎదుర్కుంటున్న అంబటి రాంబాబుతో టీవీ9 మంగళవారం సాయంత్రం ఓ లైవ్ ప్రోగ్రామ్ ను నిర్వహించింది. తనపై వచ్చిన ఆరోపణలపై వివిధ వర్గాలవారు వేసే ప్రశ్నలకు ఆయన సమాధానం ఇవ్వాల్సి ఉంటుంది. ఈ కార్యక్రమంలో రాజకీయ విశ్లేషకుడు వేంకటేశ్వర రెడ్డి, సీనియర్ జర్నలిస్టులు మల్లేపల్లి లక్ష్మయ్య, ఎస్ రామకృష్ణ, తెలుగుదేశం నాయకుడు బైరెడ్డి రాజశేఖర రెడ్డి వంటివారు అంబటి రాంబాబుపై ప్రశ్నల వర్షం కురిపించారు. ఆ ప్రశ్నలకు అంబటి రాంబాబు నిర్దిష్టమైన సమాధానాలు ఇవ్వకుండా తప్పించుకున్నారు.

తాను సిబిఐ విచారణకు సిద్ధపడ్డానని ఆయన చెప్పారు. ఆరోపణలు నిజమా, కాదా అని తేల్చే పని తనది కాదని, ఎపిఐఐసి వ్యవహారంలో తన పాత్ర ఏమీ ఉండదని, బోర్డు నిర్ణయం మేరకే అంతా జరుతుందని చెప్పే ప్రయత్నం చేశారు. ఈ అవినీతి గురించి వదిలేయండి, చంద్రబాబు నాయుడు పాలనలో అవినీతి మాటేమిటని అన్నారు. అన్ని తేల్చి చెప్తారనుకున్న అంబటి రాంబాబు ఏమీ చెప్పకుండానే ముగించారు. అయితే, తనకు వస్తున్న ప్రశ్నలకు ఆయన తీవ్రంగా ఇబ్బంది పడ్డారనేది మాత్రం ప్రోగ్రామ్ లో తెలిసిపోయింది. బహుశా, మరోసారి అటువంటి కార్యక్రమానికి ఆయన హాజరు కాకపోవచ్చు.