సోంపేటలో కృష్ణమూర్తి మహాలక్ష్మి ఆస్పత్రిలో బాంబు పేలుడు

శ్రీకాకుళం: శ్రీకాకుళం జిల్లాలోని సోంపేటలో ఓ వైద్యాశాలలో బుధవారం బాంబుపేలడంతో స్ధానికులు ఒక్కసారిగా ఉలిక్కి పడ్డారు. స్థానిక మహాలక్ష్మి వైద్యశాలలో ఓ బాత్ రూంలో బాంబు పేలింది. దీంతో హాస్పిటల్ లో ఉన్న సామాగ్రి, అద్దాలు ధ్వంసం అయ్యాయి. హాస్పిటల్ లో బాంబు పేలిన ప్రాంతంలో ఎవరూ లేకపోవడంతో ఎవరికీ ఏమీ కాలేదు. దీంతో ప్రాణాపాయం తప్పింది. కాగా ఈ హాస్పిటల్ డా.కృష్ణమూర్తికి సంబందించినది. ఈయన మొన్న జరిగిన సోంపేట ఉద్యమంలో కీలక పాత్ర పోషించాడు. పవర్ ప్లాంట్ వల్ల స్థానిక రైతులకు తీవ్ర నష్టం జరుగటంతో పాటు, పర్యావరణానికి వ్యతిరేకమని అంటూ ఆయన ఉద్యమంలో కీలక పాత్ర పోషించాడు. అంతే కాకుండా ఆయన పర్యావరణ పరిరక్షణ సమితి అధ్యక్షుడు.

కృష్ణమూర్తికి చెందిన ఈ వైద్యశాల సోంపేటలోని పోలీసు స్టేషన్ కు ఎదురుగానే ఉంది. దీంతో పోలీసులు ఉలిక్కిపడ్డారు. వెంటనే పోలీసులు హాస్పిటల్ కు వచ్చారు. స్థానిక తహసీల్దారు కూడా వచ్చి పరిస్థితి సమీక్షించారు. కృష్ణమూర్తి సోంపేట ఉద్యమంలో కీలక పాత్ర పోషించటంతో పేలుడు పలు అనుమానాలకు తావిస్తుంది. ఆంతేకాకుండా ఎవరూ ఉండని బాత్ రూంలో పెట్టడం, సోంపేట ఉద్యమం తదితర విషయాలను పోలీసులు పరిగణలోకి తీసుకొని దర్యాప్తు చేసే అవకాశాలు ఉన్నాయి.