కెసిఆర్ కు కౌంటర్: తెలంగాణలో టిడిపి చంద్ర దళం

హైదరాబాద్‌: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మిలిటెంట్ చర్యలను ఎదుర్కోవడానికి తెలుగుదేశం పార్టీ అధ్యక్షుడు నారా చంద్రబాబు నాయుడు కూడా ఓ దళాన్ని ఏర్పాటు చేశారు. చిరు ఫోర్స్ ఏర్పడిన రోజే తెలుగుదేశం పార్టీ చంద్ర దళం రూపుదిద్దుకోవడం యాదృచ్ఛికమేమీ కాకపోవచ్చు. తెలంగాణ వరకే చంద్ర దళం ఏర్పాటైనట్లు రాజకీయ వర్గాల్లో ప్రచారం జరుగుతోంది. ఈ దళంలో శారీరకంగా బలమైన యువకులు ఉంటారు. ఈ దళంలో హైదరాబాద్ ప్రాంతానికి చెందిన తీగల కృష్ణా రెడ్డి, అరవింద్ కుమార్ గౌడ్, దక్షిణ తెలంగాణ నుంచి రేవంత్ రెడ్డి, ఉత్తర తెలంగాణ నుంచి గోనె హనుమంతరావు ఉంటారు. దళంలో కనీసం 25 మంది ఉంటారు.

తెరాస, దాని అనుబంధ సంస్థల నాయకులు చేస్తున్న విమర్శలను ఈ దళం తిప్పికొడుతుంది. అవసరమైతే తెరాస నాయకులపై, దాని అనుబంధ విద్యార్థి సంఘం నాయకులపై, కార్యకర్తలపై ఆ దళ సభ్యులు ఎదురు దాడులకు పూనుకుంటుంది. ఈ చంద్రదళం మరో వారం రోజుల్లో పూర్తిగా రూపుదిద్దుకోవచ్చునని అంటున్నారు. ఈ దళంలో తెలంగాణకు చెందిన కడియం శ్రీహరి వంటి సీనియర్ నాయకులకు స్థానం కల్పించడం లేదు.