యెడ్యూరప్పపై తిరుగుబాటుకు గాలి జనార్దన్ రెడ్డి రెడీ

బెంగళూరు: ముఖ్యమంత్రి యెడ్యూరప్పపై తిరుగుబాటుకు మంత్రి గాలి జనార్దన్ రెడ్డి మరోసారి రంగం సిద్ధం చేస్తున్నారు. యెడ్యూరప్ప చేపట్టిన మంత్రి వర్గ విస్తరణపై గాలి జనార్దన్ రెడ్డి వర్గం తీవ్రంగా మండిపడుతోంది. ముగ్గురికి ఉద్వాసన పలికి ఆరుగురికి మంత్రివర్గంలో యెడ్యూరప్ప చోటు కల్పించారు. పదవులు ఇవ్వలేదని ఇద్దరు శాసనసభ్యులు రాజీనామా చేశారు. నాయకత్వ మార్పిడికి తాము సిద్ధంగా ఉన్నట్లు గాలి జనార్దన్ రెడ్డి వర్గం ప్రకటించింది. ఉన్నత విద్యామంత్రి అరవింద లింబావళి, క్రీడల మంత్రి గళహట్టి శేఖర్, మరో మంత్రి శివనగౌడ్ నాయక్ కు మంత్రివర్గం నుంచి మంగళవారంనాడే ఉద్వాసన పలికారు. రాజీనామా చేయడానకి వారు నిరాకరించడంతో గవర్నర్ కు సిఫారసు చేసి యెడ్యూరప్ప వారిని మంత్రివర్గం నుంచి తొలగించారు.

గుళహట్టి శేఖర్ కు ఉద్వాసన పలకడంపైనే కాకుండా యెడ్యూరప్పకు సన్నిహితులైన శోభ రంద్లాజే, వి. సోమణ్ణలకు మంత్రివర్గంలో చోటు కల్పించడంపై గాలి జనార్దన్ రెడ్డి వర్గం ఆగ్రహంతో ఊగిపోతోంది. తన అనుయాయులతో గాలి జనార్దన్ రెడ్డి పంచాయతీరాజ్, గ్రామీణాభివృద్ధి మంత్రి జగదీశ్ శెట్టర్ ఇంట్లో సమాలోచనలు జరిపారు. మంగళవారం ఉదయం జరిగిన మంత్రివర్గ సమావేశానికి గాలి జనార్దన్ రెడ్డి, గాలి కరుణాకర్ రెడ్డి, శ్రీరాములు, జగదీశ్ శెట్టర్ హాజరు కాలేదు. ఈ స్థితిలో అసంతృప్తిని చల్లార్చేందుకు యెడ్యూరప్ప తన అనుచరులతో చర్చలు జరిపారు. ఏమైనా, మరోసారి యెడ్యూరప్ప ప్రభుత్వం చిక్కుల్లో పడే అవకాశం ఉంది.